Baki

Ning buntaga, nalingaw pagpaso-paso si Delia sa natad sa balay nga iyang giabangan ug gi-estaran dinhi sa siyudad. Iyang gihikaphikap ang busyad niyang tiyan.

Tangkod na nga siyam ka bulan ang iyang gisabak ug nagpaabot na lang siya og mga adlaw nga siya manganak. Mahimo na siya nga inahan apan dili asawa.

Biktima si Delia sa bakak nga pasalig kay minyo diay si Bert, ang kauban niya nga supervisor sa dako’ng Mall nga iyang gitrabahoan sa siyudad.

Nasangit ang panan-aw ni Delia sa usa ka lim-aw ubos sa punoan sa kahoy duol sa balay nga iyang giabangan. Maoy nasugat sa iyang panan-aw ang usa ka baki nga malipayon nga naglangoylangoy sa lim-aw uban sa gamay pa kaayong mga baki.

Naseguro ni Delia nga inahan ang maong baki nga daw nakighagwa sa paglangoylangoy sa gamay pa niyang mga anak.

Gihapuhap na usab ni Delia ang busyad niya nga tiyan. Gikasabot na niya si Mrs. Verallo, ang tag-iya ning balay, nga iyang giabangan nga ipasagop niya ang iyang gimabdos kun manganak na siya.

Dili siya buot masayran sa iyang mga ginikanan sa probinsiya nga usa siya ka disgrasyada dinhi sa siyudad. Dili pa siya andam mogalam ug moamuma og usa ka bata.

May gamay na nga tinigum si Delia sa bangko sulod sa lima ka tuig na niya nga pagka-supervisor sa mall. Kalit mikisdom ang langit sa halayong bukid sa siyudad.

Talibundak ang kusog nga ulan didto sa bukid. Nasugat na usab sa panan-aw ni Delia ang inahang baki sa lim-aw nga abtik kaayong mipasakay sa gamay niyang anak sa iyang bukobuko ug abtik nga milangoy aron mokawas sa lim-aw.

Nasayod ang inahang baki nga inigbundak sa kusog nga ulan, molamwas ang kusog nga baha sa lim-aw ug segurado nga maanod gayud ang gamay niyang anak.

Nakapanglingo si Delia nga naghunahuna sa talagsaong pagmahal sa inahang baki ngadto sa gamay pa kaayo niya nga anak nga miluklok na sa lungag sa yuta sa ibabaw’ng punoan sa kahoy.

Gihikap na usab ni Delia ang siyam na ka buwan niya’ng tiyan. Kalit siya nga nalamdagan! Iyang nahukman nga dili na niya idayon ang gikasabotan nila ni Mrs. Verallo. (Kataposan)