Ang butakal sa mangtas

Kapin na sa tulo ka bulan nga si Rogo wala na makit-i nga mogawas sa iyang balay aron pag-adto sa iyang uma. Nalibon na gani ang iyang uma.

Nasakit kuno si Rogo mao nga dili na mogawas sa ilang balay kay daot na kuno kaayo. May nag-ingon nga si Rogo gipadautan.

May miingon nga si Rogo gipatakdan ug matud pa ‘sab sa uban nga si Rogo nahiloan mao nga laygay ang iyang pagdaot.

Ang asawa ni Rogo nga si Feliza mao na lang ang mogawas sa balay aron mopalit og makaon alang sa iyang bana.

Hinuon, wa’y problema ang magtiayon kay aduna sila’y daghang mga hayop.

Duna sila’y baka, kanding, mga manok, gangsa ug labaw sa tanan duna sila’y usa ka dako’ng butakal.

Sagad sa ilang mga silingan kun manguwag na ang ilang anay adto sila magpahabal sa butakal ni Rogo.

Si Feliza nga asawa ni Rogo may katahom nga kaibgan g’yud sa kalakin-an kay husto ang gitas-on ug puti ang pamanit, bus-ok ang lawas ug bugol kaayo’g aping.

Si Rokrok nga himabaye kaayo sa ilang sityo may plano nga iyang angkunon si Feliza ug makigrelasyon siya niini sa hilom.

Nagtuo g’yud siya nga naibog pud si Feliza kaniya kay mopahiyom kini kun iyang kidhatan.

“Ayaw, bay Rokrok uy.. maluoy ta ni Rogo, nasakit gud tawon ang bana, unya imong tentalon si Feliza. Ayaw uy,” matud ni Isok nga wala makauyon sa plano ni Rokrok.

“Ah, basta kay angkunon ko g’yud siya bay Isok. Lamia ra ba’g lawas anang Feliza.. wala pa g’yuy anak,” ni Rokrok.

Tuod, usa ka gabii, nanaog si Feliza aron pagsusi sa ilang mga gangsa, kalit lang siya nga gigakos ni Rokrok ug dayon gidigo og halok.

“Ayawww! ayaw, Rokrok! maluoy ka, may bana ko! hayop!” ni Feliza pa nga nangurog sa kahadlok. Apan gipahigda na siya ni Rokrok sa yuta aron angkunon na.

Unya kalit lang may tingog sa baboy. Ang butakal nilang Rogo! Isog kaayo kini nga nagbarog sa likod ni Rokrok ug dayon gipaak si Rokrok, gihabhab ang dapit sa iyang kinatawo.

Pagkaugma, hipalgan ang patay’ng lawas ni Rokrok didto sa may lugot nga nakuniskunis na. Unya nakita sa mga silingan sila si Feliza ug Rogo nga naglawog sa ilang butakal nga kabilin sa inahan ni Feliza nga mangtas. (Kataposan)