Ambisyosa - Gula 10

Nasayran ni Lito nga ang hamtong lalaki nga nangutana kaniya kabahin sa serbisyo sa shop, amahan diay ni Marit.

Nakatuo na g’yud si Lito nga anak og adunahan si Marit tungod kay ang amahan niini nindot kaayo og sakyanan ingon man maila usab sa iyang pamorma.

Pagka ugma, miagi si Marit sa shop nga gitrabahoan ni Lito pagka alas singko sa hapon. “Birthday diay sa among usa ka katabang karon ug gihikayan siya ni daddy. Gusto si daddy nga moadto ka sa balay kay may isulti siya nimo,” matud ni Marit.

“Mauwaw ko sa imong daddy uy,” mubo nga tubag ni Lito nga nagpangawot sa iyang ulo. “Maayong tawo ug buotan si daddy, Lit,” sagbat ni Marit nga ingon sa mapugsanon nga moadto sa ilang balay si Lito. Tuod, misakay si Lito sa kotse ni Marit kay bag-ong nahalin ang iyang awto ug wala pa siya makapalit og laing sakyanan. Dali ra sila nga miabot sa harianong panimalay nila ni Marit sa Beverly Hills.

“Maayo kay wala mo ako pakyasa Lito. Ako ang nagsugo ni Marit nga ipadapit ka kay aduna kita’y panagsultihan nga mahinungdanon,” matud sa amahan ni Marit. Human nila’g pangaon, didto sila si Lito ug ang amahan ni Marit magsultihanay sa dapit nga walay makadungog kanila.

“Walay gitago kanako ang akong anak nga si Marit. Gitug-anan ko niya nga nahigugma siya nimo Lito,” matud sa amahan ni Marit. (Sumpayan)