Naamiga sa FB

Gula 4

Mapanagan-on kaayo si Ramon. Gipanid-an niya kun kinsa nga lalaki sa grupo nga suod kaayo ngadto ni Kenn kay posible nga mao kini ang iyang boyfriend. Diha nga nakahigayon si Ramon, gipangutana g’yud niya si Kenn kun kauban ba niya ang iyang boyfriend sa pagpangaligo sa dagat.

Mikatawa si Kenn. Dili makatuo si Ramon diha nga giingnan siya sa dalaga nga wala siya’y boyfriend. Nagtuo g’yud siya nga gibakakan lang siya ni Kenn.

“Pagkaon usa Kenn kay para mangaligo na ta,” matud ni Kenn nga nagsul-ob og luag nga T-shirt. Nakabantay tuod si Ramon nga basa ang gisul-ob nga T-shirt ni Kenn nga gisapaw lang sa iyang bathing suit.

Nagtaob ang dagat ug nangaligo na pagbalik ang mga kauban ni Kenn. Nakahigayon pagtutok pag-ayo si Ramon kang Kenn diha nga naglantaw kini sa mga barkada nga didto na sa dagat.

Maanyag gayud si Kenn. Gikan sa panagway, ang panan-aw ni Ramon anam-anam kini nga midailos pagsud-ong sa dughan ug ngadto na sa hamis kaayo nga paa sa dalaga.

Ingon sa nagtubod ang laway ni Ramon nga nagsud-ong. Unya, abtik siya kaayo nga nakalingi diha nga mitan-aw kaniya si Kenn.

Pagkahuman og kaon ni Ramon, giagni na siya ni Kenn nga maligo na sila sa dagat. Gihukas na ni Kenn ang iyang luag nga T-shirt ug nabantang na kaayo sa mga mata ni Ramon ang nindot kaayong lawas sa dalaga.

Wala kapugngi ni Ramon ang pagtulon og laway. “Tana Mon,” matud ni Kenn nga migunit pa sa kamot sa ulitawo. (Sumpayan)