May gitago ang kangitngit

Gula 54

Gipangutana dayon ni SPO1 Nicko Bernal ang ilang hepe kun nakaila ba siya sa mga tawo nga mirakrak og mga bala sa iyang panimalay.

“Wa g’yud ko’y nailhan nilang tanan,” matud ni Chief Inspector Dindo Raval. Iyang gipasabot nga wala manganaog sa ilang gisakyan ang mga armadong tawo.

Didto ra sila sa sulod sa sakyanan sa dihang ilang gipaulanan og mga bala ang gipuy-an sa hepe.

“Kinsa man kaha kadtong mga tawhana?” Ngano nga buot ka man nila nga patyon sir?” nakapangutana si Nicko.

“Wa nay lain, Nicko, ang mirakrak og mga bala sa imong balay niadtong miaging gabii mao ra usab ang nagrakrak karon sa akong gipuy-an. Sa laktod, usa ra’y utok niining tanan,” matud sa hepe.

“U-unsa ang buot mo nga ipasabot, sir?,” nakasukit si Nicko.

“Di na kita angay magduhaduha, Nicko. Ang nagpaulan sa imo ug akong gipuy-an mao ang mga sakop sa Bangkulis Black Brotherhood,” matud ni Chief Inspector Raval.

“A-ang buot mo nga ipasabot, Sir, nga sangkap usab sa armas ang mga sakop sa maong kulto?” ni Nicko.

Gipasabot sa hepe nga ang mga sakop sa kulto dali ra nga makahupot og armas. - Sumpayan