May gitago ang kangitngit

Gula 53

Giawhag ni SPO1 Nicko Bernal ang tulo niya ka kaubang polis nga mamiya sila pagdali sa maong dapit kay mangadto dayon sila sa balay sa ilang hepe nga si Chief Inspector Dindo Raval.

“Mangadto kita karon dayon sa balay ni sir kay girakrakan sa armado nga mga tawo ang balay sa atong hepe,” giingnan ni Nicko ang iyang mga kauban human sa ilang panagsulti sa cellphone.

Kadali ra sila nga nakaabot sa nahimutangan sa sakyanan. Nanakay dayon sila. Si Roy nga maoy nagdray’b mipahugong pagpadagan sa patrol car subay sa tanos kaayo nga karsada.

Midiretso sila sa balay nga gipuy-an ni Chief Inspector Raval. Ulitawo nga guwang ang ilang hepe ug nag-inusara pagpuyo sa ilang ancestral home.

Sa ilang paghunong tungod sa pinuy-anan sa hepe, nakita nila ang daghang buslot sa bungbong niini. May mga silingan nga misugod pagpanguryoso pagkamatikod nga nag-abot na ang mga polis.

Gisugat sila ni Chief Inspector Raval. “Wa ka ba maunsa, sir?” nangutana dayon si Nicko.

“Wa, Nicko, apan dako ang kadaot nga nahitabo sa akong balay. Nangabuslot ang bungbong ug nangabuak ang bildo nga bentana, apil ang pipila ka gamit sulod sa balay. (Sumpayan)