Pista sa bukid

Gihatagan og higayon sila si Kenn ug Lyn sa iyang mga barkada nga magkaparayganay kay nasayod sila nga magkalagyo na sila pipila ka gutlo gikan karon.

Nagpalayo lang sila si Alice, Clemen ug si Nympha nga maguwang-babaye ni Kenn, samtang sila si Kenn ug Lyn didto nanglingkod sa lantay ilawom sa mansanitas daplin sa karsada.

Ngiob og gamay sa ilang nahimutangan ug kay alas tres pa sa kaadlawon, sila pa lang ang nagtikaw-tikaw didto. Wala’y bugto ang paggakos ni Kenn kang Lyn ug matag karon ug unya, hagkan niya ang dalaga.

“Hala, nadugay lagi ang bus?” matud ni Nympha nga nakabantay nga kapin na sa tunga sa oras nila nga pagpinaabot apan wala pa gayud moabot ang bus nga sakyan unta nila paingon sa siyudad.

Taud-taud, may nagsingabot nga motorsiklo ug mihunong sa ilang tungod. “Demalas kaayo, naguba ang bus nga mobiyahe paingon sa siyudad,” matud sa tawo nga nagsakay sa motorsiklo.

“Mao ba? Salamat kay di pa kita magkalagyo Lyn!” matud ni Kenn nga nagngisi. Sanglit, nihit kaayo ang sakyanan nga mobiyahe sa Tabuelan, nakahukom ang magbarkada nga mamalik sa balay.

“Balik na lang ta sa balay uy kay ang sunod nga biyahe sa bus paingon sa siyudad unya pang udto,” matud ni Nympha. Giingnan ni Kenn ang iyang maguwang babaye ug ang mga kauban ni Lyn nga mosunod ra sila.

Diha’ng sila na lang ang nahabilin, nagpatuyang na ang mag-sweetheart sa pagparayganay.  Ingon sa nanginit na ang ilang kalawasan. (Sumpayan)