Pista sa bukid

Nahimo nga sumsoman sa komedya sila si Kenn ug Lyn atol sa ilang pagpanihapon. Tataw kaayo nila nga nadungog ang tukar sa amplifier ug ang panagsa nga awhag sa announcer nga paadtuon na ang mga tawo.

Naghinam-hinam si Kenn tungod kay ang iyang isul-ob karong gabhiona mao ang branded nga T-shirt nga gipalit ni manang niya Nympha nga nagsilbe niya nga sinugatan.

“Wow! Kaangayan ni Kenn ah!” hapit makadungan sa pag-abiba sila si Alice ug Clemen diha nga migawas na si Kenn gikan sa iyang kuwarto nga nagsul-ob na sa iyang branded nga T-shirt.

Wala pa si Lyn kay didto pa kini sa kuwarto ni Nympha. Gipasiklapan ni Kenn sila si Clemen ug Alice. Bongga ‘sab kaayo kini og gisul-ob nga nagilak-gilak pa sa kada lihok nila kun madan-agan sa silaw sa suga.

Unya, migawas na si Lyn ug Nympha. Natulala si Kenn sa pagkakita ni Lyn nga maanyag kaayo sa iyang gisul-ob. Guwapa ‘sab kaayo si Nympha. “Lahi g’yud kaayo kining taga siyudad no? Dinhi sa baryo, ordinaryo ra g’yud ang ipangsul-ob sa mga dalaga,” matud ni Kenn.

“Ana g’yud Kenn. Dili mi mangahalin dinhi kun dili mi magpaguwapa. Maayo si Lyn kay naa na may nakagusto, ang pag-ingon na lang ang kuwang,” matud ni Alice.

Nakasabot si Kenn nga siya ang gipadungog-dungog sa gisulti sa kauban ni Lyn. Nanglakaw na sila paingon sa baylehan. Mura’g gihatagan og lugar sa mga dalaga nga sila si Kenn ug Lyn ang magkuyog. (Sumpayan)