May gitago ang kangitngit

Karon misamot ang kahugot sa pagtuo ni SPO1 Nicko Bernal nga kadtong duha ka lalaki ug usa ka babaye nga nagpaila nga taga Statistics Office ngadto sa mga ginikanan sa bata nga gipatay sa Barangay Lawis ug nagpangutana bahin sa natawhan sa ilang anak, mga sakop gayud sa kulto’ng Bangkulis.

May kalit misantop sa hunahuna ni Nicko. Gipatawag dayon niya si PO3 Roy Canares. Kadali ra nga miabot si Roy sa opisina ni Nicko nga maoy lider nila sa team.

“Balik kamo karon dayon didto sa Lawis,” giingnan ni Nicko si Roy.

Mura’g nakugang ang kaubang polis ni Roy. “Nga-ngano man, Sir?”

“Dad-a ninyo dinhi ang mga ginikanan sa bata nga gipatay. Pasabta sila nga may mahinungdanon akong tuyo kanila. Dad-a sila dinhi si Rudy ug Reuben,” ni Nicko.

Wala na magdaghan og kuti-kuti si Roy. Mituman kini sa gimando ni Nicko. Paglabay sa 45 minutos, nahibalik sila si Roy nga kuyog na ang mga ginikanan sa bata nga gipatay.

Si Roy ug ang mga ginikanan sa bata ra ang misulod sa opisina ni Nicko. Nagpabilin didto sa gawas sila si PO1 Rudy Alarcon ug PO1 Reuben Lebra. (Sumpayan)

Pista sa bukid

Ni Cindy Jones

Wala makapugong si Lyn sa pagpadayag sa iyang naghingapin nga kalipay diha nga didto na sila sa punoan sa taytayan ug nag-umbaw sila sa panoramic kaayo nga talan-awon sa dagat.

Migunit si Lyn sa bukton ni Kenn samtang mihulma sa iyang panagway ang matam-is nga pahiyom. “Kanindot ikaligo sa dagat uy,” matud ni Kenn nga mikuot sa iyang cellphone gikan sa gamay niya nga shoulder bag.

Giagni ni Lyn si Kenn ug ang duha niya ka kaubang dalaga nga sila si Alice ug Clemen nga mag-groupie sila ug background ang panoramic kaayo nga view sa dagat sa Tabuelan.

Sanglit nagkasawop ang adlaw, nakapadugang kini sa katahom sa palibot. “Mangaligo diay unya ta sa dagat Kenn ha?” matud ni Lyn nga ingon sa nahanaw na ang pagkahilomon.

Nagpahiyom lang nga nag-obserbar sila si Alice ug Clemen sa nabantayan nila sa kauban nila nga si Lyn. Mura’g nakabantay si Kenn nga gaan kaayo ang iyang buot ngadto ni Lyn. Sa laktud mura’g mibati na siya’g gugma sa dalaga.

“Ayaw dayon mo pamauli sa siyudad aron makasuroy g’yud mo sa nindot namo nga baybayon dinhi sa Tabuelan,” giingnan ni Kenn ang mga bisita sa iyang maguwang.

Kilumkilum na, namalik na sila sa ilang balay ni Kenn. Pag-abot nila, nakaandam na sa ilang pagkaon si Nympha. “Unya, may nagustohan ka ba sa akong mga guwapa nga bisita Kenn?” gikomedyahan ni Nympha ang iyang manghod. (Sumpayan)