Langgam itom sa karaang nangka

Naguol ang magtiayong Jose-Linda kay kalit lang gihilantan ang ilang anak nga si Edward ug gituboan og daku’ng hubag sa iyang liog. Wala na makaeskuyla ang bata kay matag hapon magsalimuang kini nga magpangyawyaw nga gusto siya’ng mokatkat sa karaang nangka.

Nakahukom sila  si Jose ug Linda nga dad-on nila si Edward sa ospital aron masusi kun unsa’y sakit sa bata.

“Oki man ning inyong anak. May hilanat siya apan natural man lang nga matang sa hilanat. Resitahan ta lang mo’g Paracetamol ug ipainom g’yud kini sa bata kada upat ka oras. Kining hubag sa iyang liog, oki ra man gud ni, hatagan ko lang mo og antibiotics para pahiyos,” matud sa doktor.

Gituman sa magtiayon ang gisulti sa doktor. Apan pagkagabii kalit lang nga misinggit ang bata ug midagan paingon sa punoan sa nangka likod ra sa ilang kusina.

Ilang gigukod. Kay ngitngit na man, gidagkotan ni Jose ang tukarol ug midan-ag ang kahayag sa palibot. Ilang nakita si Edward nga nakakatkat na sa nangka ug naghapyodhapyod sa  langgam nga itom.

Taas og tapay nga maora’g manok apan wala makaila si Jose kun unsa kini’ng langgama.

“Hala, Jose, unsa man na’ng langgama nga giduwaduwaan ni Edward?” ni Linda. Nagkatawa si Edward nga mitug-an sa iyang ginikanan nga ang langgam iyang amigo. “Dato kaayo ni sila Pa, Ma. Ilang balay dako kaayo,” ni Edward nga abtik na ug malipayon.

Gipakanaog ni Jose si Edward gikan sa sanga sa nangka. Pagka ugma, gibalikan na pud ni Edward sa iyang hilanat bisan gipainom na man unta nila’g Paracetamol.

Gihangyo nila ang albularyo nga si Ingko Sanong paghiling sa kahimtang sa bata. Mikunot ang agtang sa albularyo. “Kining inyong anak wa’y sakit. Nakaamigo lang siya’g anak sa usa ka dato nga engkanto. Dili ra ba dawo ang mga ginikanan sa batang engkanto. Kun mosugot mo, basin og mabulahan mo,” matud sa albularyo.

Wala na mosupak sila si Jose ug Linda nga magkahigala ang ilang anak og engkanto. Tuod nawala ang hilanat ni Edward apan matag Biyernes sa hapon dunay itom nga langgam nga mobatog sa ilang bentana ug motihol kini nga maora’g maoy iyang tawag kang Edward.

Usa ka adlaw may nahinog nga bunga sa nangka. Pagpikas ni Jose ug Linda aron kan-on, nanagko ang ilang mga mata kay ang mga suoy sa nangka’ng hinog, mga suoy man nga bulawan. “Pa, Ma, ila ta gihatagan ana aron kuno ta madato,” ni Edward pa nga didto na sa taas sa nangka nga nagduwaduwa sa itom nga langgam. (Katapusan)