Panumpa nga bakak

Gula 26

Nasagmuyo si Jeffrey nga nakadungog sa gisulti kaniya ni Janeth nga nagkanayon “Gusto ko nga mahaw-as na sa grabe’ng kalisud. Dili pareho nimo nga kun manuroy ta Jeff, duna ta’y sakyanan.” Gitimbang-timbang ni Jeffrey ang kahulogan sa gisulti ni Janeth kaniya. Mituo si Jeffrey nga daghan ang nanguyab sa dalaga tungod kay may talagsaon man kini nga kaanyag. Apan ang nakapahasol kang Jeffrey mao ang gisulti ni Janeth nga ganahan siya kaniya kay aduna siya’y sakyanan.      

Karon nakasabot na si Jeffrey nga ambisyosa diay kaayo si Janeth ug mao diay nga dali ra niya kini nga napasugot tungod kay nagtuo tingali kini nga siya maoy tag-iya sa Mitsubishi Strada nga ilang gisakyan sa pagpangaligo ug karon sa ilang pagpanuroy.

“Naunsa ka uy! Mura ka man og wala sa huna-huna!” nakalitan si Jeffrey ug ingon sa nahigmata siya gikan sa halawom kaayo nga paghanduraw. May kasubo nga mibathay sa iyang panagway nga misud-ong kang Janeth.

Dayon, gibuhian ni Jeffrey ang usa ka halawom kaayo nga pangagho. “Nangandoy ka ba diay Neth nga ang imong boyfriend adunay sakyanan ug kuwartahan?” gipangutana ni Jeffrey ang iyang girlfriend.

“Dili man g’yud kay kuwartahan kaayo, bisan pareho lang gud nimo nga nindot og Strada nga masakyan nato. Kapoy na kaayo’g lakaw uy. Maayo nga makatilaw na ‘sab ko og gamay’ng hamugaway,” matud ni Janeth.

Karon nasabot na gayud ni Jeffrey nga nag-apas ra g’yud diay si Janeth nga kuwartahan ang iyang mabana aron siya mahaw-as sa kalisod base sa iyang gisaysay. Nakahukom si Jeffrey nga tug-anan si Janeth nga dili iya ang sakyanan nga ilang gigamit-gamit.

Ingon sa mikalit pagkisdom ang dagway ni Janeth. Mibangon si Janeth ug nag-ilis. “Tana, mamauli na ta,” ni Janeth. Kadto maoy kataposan nila nga panagkuyog kay wala na g’yud mokontak pa si Janeth kang Jeffrey. (Kataposan)