Panumpa nga bakak

Gula 23

Gikulbaan si Jeffrey samtang nagpaabot siya sa tubag ni Janeth. Iya kini’ng giingnan nga gusto niya nga manulod sila sa motel.

Apan samtang wala dayon motubag si Janeth kang Jeffrey, mibathay sa iyang panagway ang tinagoan nga pahiyom. Nagpasabot kini nga wala siya masuko nga gihangyo sa iyang boyfriend nga manulod sila sa motel.

“Mosugot ka ba Neth? Di ba gipasaligan man ko nimo samtang didto kita sa baybayon nga magdeyt ra unya kita aron nga magkaparayganay g’yud ta og maayo?” giingnan ni Jeffrey ang iyang girlfriend.

Ang wala pagtingog ni Janeth giisip na ni Jeffrey nga wala kini pagsupak sa iyang hangyo. Human sa ilang pagpangaon, nanglakaw sila paingon sa giparkingan nila sa sakyanan.

Giagbayan ni Jeffrey si Janeth samtang naglakaw sila paingon sa Mitsubishi Strada. “Bag-o pa nimo ni napalit nga sakyanan Jeff?” matud ni Janeth nga mikaw-it na sa iyang bukton sa tuo nga bukton sa ulitawo.

“Dili kini akong sakyanan Neth,” mubo nga tubag ni Jeffrey apan wala motuo si Janeth sa iyang gisulti. “Hmm, bisan iya g’yud ni nga sakyanan,” matud ni Janeth.

Human makasakay si Janeth, gisirad-an ni Jeffrey ang pultahan ug milipot siya paingon sa pikas bahin sa sakyanan. “Humot pa kaayo ni’ng imong sakyanan no? Ilhanan nga bag-o pa g’yud ni kaayo,” dugang ni Janeth.

Wala na tagda ni Jeffrey ang pamahayag ni Janeth. Gipasirit niya ang sakyanan paingon sa usa ka motel nga kilid sa Cebu City Health department.

Naghinam-hinam na si Jeffrey sa sunod nga mga panghitabo. (Sumpayan)