Tim-os nga pagbati

Gula 4

Nasabtan ni Loreto nga nalingaw kaayo si Evelyn sa iyang trabaho sa shop. Igo lang siya nga molista sa mga mapalit nga butang ug kun pila ang kantidad sa mabayad. Kini maoy basehan ni Loreto kun miganansiya ba siya sa iyang negosyo.

Nalipay si Evelyn kay pinangga siya ni Loreto nga mihatag pa gani kaniya og kuwarto nga adto siya matulog nga lahi g’yud sa kuwarto nga katulganan sa kusinera nila nga edad-edaran na.

Hapit na ang ting-abli sa klase ug gipa-enrol ni Loreto si Evelyn sa University of the Visayas (UV) kay aron makatapos kini sa high school. Paspas ang pagpanglabay sa panahon ug nahuman g’yud ni Evelyn ang high school.

Usa ka adlaw, gisukna si Loreto ni Evelyn nga dala ang komedya kun makapadayon pa ba siya pagtungha sa koleheyo. “Sure, makatungha ka gihapon sa college. Ako ra’y bahala sa imong gastohan Lyn, basta pagbinuotan lang g’yud,” matud ni Loreto.

Napagakos sa kalipay kang Loreto ang dalagita. Mura’g amahan na ang iyang pag-ila kang Loreto nga buotan kaayo ngadto kaniya. Gipamalitan ni Loreto sa tanan niya nga gamit si Evelyn.

Usa ka hapon, naabtan sa iyang mga apohan si Evelyn nga gikan sa tunghaan nga angayan kaayo sa iyang uniporme.

Wala makapugong ang mga apohan sa pagpahiyom nga nagtan-aw sa ilang apo.

“Wala gayud kami masayop sa pagtugyan nimo dinhi kang Dong Loreto day Evelyn,” matud sa Lola ni Evelyn. Igo lang mipahiyom si Evelyn.

“Guwapa ka na kaayo day, nasaypan ka na gani sa uban nga anak sa tag-iya sa junkshop,” dugang sa Lolo ni Evelyn. (Sumpayan)