Napupos na ang pailob

Ang isla Virginia maoy usa ka isla nga madanihon. Dagaya kini sa dagatnong pagkaon. Ang iyang mga balas maoy puti, mao nga daghan ang mutuyo pagduaw niining maong isla aron lang sa pagtagbaw sa dagatnong pagkaon ug sa pagpangaligo.

Apan adunay nakapatugaw sa kalinaw sa mga lumolupyo dinhi, kini mao si Peryong. Anak siya og mga ginikanan nga impluwensiyado sa maong isla. Ang iyang papa Fermin maoy mamalit sa mga isda sa isla ug itumod ngadto sa siyudad. Ug ang iyang mama Tecla maoy kapitan sa maong isla. Mao nga si Peryong migara ug nahimong abusado. Gipatungha siya sa siyudad apan gisayang lang niya. Barkada ang giuna.

Pagkamatay sa iyang mga ginikanan, gihurot og baligya ang tanang kabilin ni Peryong. Milalin sa siyudad, nagminyo ug didto nagdiskarte aron manginabuhi. Matag karon ug unya mopauli sa isla ilabi na kun magsaulog sa tinuig nga pista. Inig kaliwas sa pista sa dihang wala nay polis musugmat dayon ang pagkaabusado ni Peryong. Mo-order og ilimnon sa tindahan wala’y bayad-bayad. Mosugat og isda sa baybayon, thank you. Kun moreklamo, hulgaon, ipasiwil ang kalibre .45. Dili lang kausa, halos tuig-tuig kining gibuhat ni Peryong.

Daghan ang reklamo ang miabot sa opisina ni kapitan Pablo Belaneso. Apan wala’y nahimo ang mga barangay tanod sa armas ni Peryong. Ingon sa napupos na ang pailob ni Kap. Liwas sa pista misugmat  na usab ang kaabusado ni Peryong. Aduna na usab reklamo sa kapitan. Nakahukom siya, siya na mismo ang mosumpo sa kaabusado ni Peryong.

Kuyog sa duha niya ka mga tanod mipadulong siya sa tindahan nahimutangan ni Peryong. Pagkakita ni Peryong sa presensiya sa kapitan imbes motahan nga malinawon mipasalipod kini sa lubi ug gipabuthan ang kapitan. Dinhi nagsugod ang pinusilay ug ginukdanay. Ang katalaw nahawan, ang kaisog mipatigbabaw.

Tungod sa masipang mga buto buto ang mga tawo nangalisang. Human sa pipila ka minuto nga aksyon nahutdan og bala si Peryong.

Piniko ang iyang mga tuhod giisa ang iyang mga kamot, gitahan ang iyang kaugalingon sa kapitan. Gidala siya sa lungsod ug didto gipasakaan siya og tukmang kaso.

Sukad niadto nakabaton na usab og kalinaw ang isla Virginia. (Kataposan)