Sulagma nga deyt

Gula 4

Wala dayon motubag si Jenny diha nga gipangutana siya ni Aldrin kun may boyfriend na ba siya didto sa ilang probinsya sa Bohol. Mura’g iyang gihuna-huna kun maayo pa nga iyang tug-anan ang iyang Valentino.

“Bitaw, may boyfriend na ko sa didto pa ko sa Bohol apan wala na kami komunikasyon sukad ko nga mianhi sa Sugbo,” matud ni Jenny. “Ikaw, Aldrin, pila kabuok ang imong gilfriend?” bawos-pangutana ni Jenny.

“Wala uy, kun duna pa ko’y girlfriend, mangita kaha ko og ikadeyt nga Valentina karong adlawa?” matud ni Aldrin. Mipahiyom lang si Jenny nga naminaw ni Aldrin.

“Bitaw, may uyab ko nga kauban namo sa trabaho apan mipauli siya sa Mindanao ug wala na mi kontak,” paapas ni Aldrin. Taud-taud, nadungog nila ang awit nga gipatukar sa barko nga nag-angkorahe sa Pier Uno.

“Nindot kaayo ang kanta nga gikan sa barko, Love Comes from the Most Unexpected Places ang title aron nga kanta,” giingnan ni Aldrin si Jenny. “Bitaw, nice kaayo nga kanta no?” midason si Jenny.

Gigunitan ni Aldrin ang wala nga kamot ni Jenny. “Mura’g tukma kaayo kanato’ng duha ang kahulogan sa mao nga awit.

Wala lang nato palandonga Jen nga karong gabhiona atol sa Valentines Day ikakita ko ikaw. Gipitik ka sa akong kasing-kasing Jen,” matud ni Aldrin.

“Ah, kapaspas nimo Aldrin uy, tungod lang sa kanta gipanguyaban na man ko nimo,” gikusnit na ‘sab ni Jenny ang kilid ni Aldrin. “Unsay dugayan?” nagkatawa na lang ‘sab si Aldrin.

Diha’ng napupos na ang kanta, nahilom sila. Apan dungan sila nga mihugyaw kay awit ni Kenny Rogers nga Lady maoy gipatugtog. “Wow, very romantic kaayo ang ilang mga music uy,” ni Jenny pa. (Sumpayan)