Gugma sa bitin

Gula 16

Nanglipaghong si Kenneth pagkakita nga ang manager sa kompaniya nga giaplayan niya’g trabaho mao diay si Roland nga giubanan niya sa hotel atol sa miagi’ng Sinulog ug gikawatan niya sa pitaka samtang maayo’ng pagkahinanok.

“Nahinumdom ka pa ba kanako Kenneth? Nahurot mo na ba og gasto ang kuwarta nga didto sa akong pitaka nga imong gikuha?” matud ni Roland. Miduko si Kenneth sa grabe’ng kauwaw. Gipunit ni Roland ang iyang cellphone nga diha sa ibabaw sa lamesa ug aduna siya’y gitawgan.

Wala danti og minuto, may misulod nga tawo. “Maayo ka’y ania ka na John. Mao kini ang babaye nga mikuha sa akong pitaka nga akong gipa-blotter sa inyo’ng police station liwas g’yud sa Sinulog Grand Parade,” giingnan ni Roland ang tawo nga misulod sa iyang opisina.

“Polis kini siya Kenneth. Itug-an kun asa na ang akong mga mahinungdanong ID cards nga sulod sa akong pitaka nga imong gikuha,” may pagka pintok ang pagkasulti ni Roland. Mihilak na si Kenneth nga klaro kaayo nga gikuyawan na.

Gibuksan niini ang dala niya nga bag ug gitunol kang Roland ang pitaka. “Kuwarta ra ang akong gikuha, wala nako pasipad-i ang mga ID cards kay nasayod ko nga hasol kaayo ang paglukat og bag-o,” matud ni Kenneth.

Nagbakho na g’yud si Kenneth samtang nagduko. “Sori kaayo Sir, duna ko’y anak ug nagkinahanglan nga patambalan niadto’ng higayon nga nagkita ta mao nga natintal g’yud ko sa pagkakita ko sa imong kuwarta.” Walay pumamilok si Roland nga nagsud-ong kang Kenneth. Gitan-aw ug gisabot niya kun wala ba lang mag-inartista ang babaye. (Sumpayan)