Gugma sa bitin
Baliwala lang ni Roland nga nasibat ni Kenneth ang kapin sa P20 mil niya nga kuwarta. Diha pa siya nakamatngon sa batasan ni Kenneth. Ang gianugnan ni Roland mao ang iyang mga ID ug tulo ka ATM cards nga gidala pa g’yud ni Kenneth.
Gipa-blotter ni Roland ang pagkahanaw sa iyang mga mahinungdanong butang pinaagi sa iyang amigo nga polis nga nadistino sa Cebu City Police station-2.
Milabay ang mga adlaw, buwan ug dul-an na sa usa ka tuig gikan sa mao nga hitabo. Milambo ang kompaniya nga gidumala ni Roland. Nagpa-advertise sila sa Banat News nga nanginahanglan sila’g dugang kawani.
Tuod, daghan kaayo ang nangaplay nga misumiter sa ilang applications ug gipasukipan og biodata. Gitagsa-tagsa kini pagtan-aw ni Roland ug napasiga ang iyang mga mata.
Napunting sa iyang mga mata ang panagway ni Kenneth nga diha sa hulagway nga gipapilit sa biodata. Wala siya masayop kay iya gayud ni Kenneth ang hulagway.
Hilom nga nagpangagot ang ngipon ni Roland nga mikuha sa iyang ballpen. Gibutangan niya’g note ang application ug dayon, gipindot ang buzzer paingon sa iyang secretary nga dali kaayo nga misulod sa opisina sa manager. “Miss Rhoda, I want to see this applicant tomorrow morning,” giingnan ni Roland ang iyang secretary. Naglungot-lungot g’yud si Roland ug gusto niya nga makita niya pag-usab si Kenneth.
Pagka ugma, sayo kaayo nga miabot si Roland sa opisina. Gusto siya nga dili makakita kaniya si Kenneth.
Nahibulong ang secretary ni Roland kay dili kasagaran nga magsul-ob og sunglasses ang ilang manager, apan karon, gawas nga nag-sunglasses nagsul-ob pa g’yud og kawo nga pinayungyong. (Sumpayan)
- Latest
