Jezebel

Gula 157

Type nako ang imong beauty, Jezebel,” presko’ng padayag ni Red. “Gusto ko’ng makadimdim sa katam-is sa dugos sa imong pagkababaye.”

“Bastos!” ako siya nga gisingkahan.

“No. Dili ko bastos, Jezebel. Nakursonada lang ko sa imong katahom maong naingon ko niini. Ipasalig ko kanimo nga lipayon ko ikaw kun mosugot ka nga mosulod ko karon sa imong kuwarto.”

“Wa pa ko mabuang, Red. Dili mahitabo’ng pasudlon ko ikaw sa akong kuwarto.”

“Mao ba? Nga sa ato pa, may pinalabi ka? Ang uban makasulod sa imong kuwarto pero ako dili?”

Kalit lang kong gikulbaan pagkadungog sa gisulti ni Red. Alang nako, salabtunon ang iyang sinultihan. Mora’g may nasayran siya sa akong sekreto.

“U-unsay buot mo’ng ipasabot?” Gipangutana ko siya.

“Ayaw na lang pagpakaaron-ingnon pa, Jezebel,” nagkanayon si Red. “Nasayod na ko sa imong tinagoan. Aw, tinagoan ninyo ni sir James.”

“U-unsa?” misamot nga gikulbaan ko.

“Dili ka makalimod nako. Niini’ng ulahi’ng mga adlaw, kanunay ko’ng makakita ni sir James nga mosulod sa imong kuwarto panahon sa kagabhion.”

Wala ko makatingog. Mura ko’g nasud-ipan. -- Sumpayan