Babaye sa kabaret

Gula 5

“Wala ka na’y tiket? Pagpalit usa didto sa counter, mangundang usa ‘tag sayaw,” giingnan si Berto sa dancer sa kabaret nga wala pa g’yud niya makita ang panagway tungod sa kangitngit.

Nakasabot si Elizar kun ngano nga ang iyang uyoan miundang sa pagsayaw. Ang babaye nga gisayawan ni Berto milingkod tupad ra kanila apan dili gihapon madunggan kun unsay ilang gipanagsultihan tungod sa kasaba sa tukar.

“Kumbati g’yud tiyo. Bahala ka na sa babaye nimo nga kapares. Dili kana sila masuko bisan unsaon nimo’g gakus kay mao kana ang ilang trabaho,” giingnan ni Elizar ang uyoan.

Mibawos paghunghong si Berto sa dunggan sa pag-umangkon. “Lami kaayo modala’g sayaw ang babaye’ng akong gikasayaw dong.. puwerte’ng piita modala’g gaksanay, humot pa g’yud kaayo.”

“Paliton ba kadto’ng tiket dong? Dia man ko’y kapin pa sa tres sientos nga subra sa plete nako paingon dinhi sa siyudad. Ipalit nato ni’g tiket dong kay nahigam ko da,” nahimuot si Elizar sa uyoan.

Wala niya dawata ang kuwarta ni Berto ug miadto si Elizar sa counter ug mipalit siya’g 30 ka tiket. “Kana tiyo, makasayaw ka na g’yud ana og dugay-dugay. Ayaw paalkanse, maneho g’yud,” iyang giingnan ang uyoan.

Dunay gisulti si Elizar kang Berto sa dayon niini’ng guyod pagbalik sa babaye. “Dili kaha ta masagpaan dong?” matud sa uyoan. Gihunghongan ‘sab ni Elizar ang babaye.

“Sure, lingawon nako ni pag-ayo ang imong uyoan,” giingnan sa babaye si Elizar. Pagsugod g’yud sa tukar, naggakus dayon sila si Berto ug ang babaye.

Misamot nga nakalitan si Berto kay ang babaye mora na’g tuko nga mipilit kaniya. Nasingo na usab ni Berto ang kahumot sa babaye nga nakapatingkag sa iyang pagka lalaki. (Sumpayan)