Mga pakyas nga kasingkasing

Alas siyete sa buntag. Niagi na sab si Chona sa karsada dikit sa balay ni Larry, kanhi niyang hinigugma. Kada  adlaw kaduha gyud siya molabay dinhi.

 Sa alas singko sa buntag, inig sugod niya’g hike padulong sa plasa sa ilang lungsod. Ug inig pauli niya human sa duha ka oras niyang libutlibot sa plasa.

Singkuwenta anyos na si Chona. Dalaga pa. Pero si Larry minyo na. Naasawa niya ang iyang sekretarya. Usa ka mechanical engineer, nahimo si Larry nga manedyer sa Green Meadow Industries, Inc. usa ka dakong kompaniya nga nag-deal og mga heavy equipment.

Mingaw ang balay ni Larry. Way nagtikawtikaw. Way bata nga nagduwa. Wa sila’y anak ni Gina nga kanhi sekretarya niya. Wa basola ni Chona si Larry sa ilang panagbuwag. Politika ang hinungdan.

Kay ang ilang masig ka ginikanan, dulot sa bukog ug lunod patay nga mosuporta sa ilang partido. Lainlain sila’g partido. Bisa’g kababata sila ni Larry ug childhood sweetheart, wa hatagi og gibug-aton sa ilang mga ginikanan. Gipabuwag gyud sila. Way nahimo si Chona. Sa tago na lang siya maghilak sa iyang pagsupak.

Ning kabag-ohan, nakadungog si Chona nga  nag-away-away na sila’s Larry ug Gina. Tungod kay wa sila’y anak, nagkapul-anay sa ilang mga hitsura. Buntag, udto, hapon, gabii, tanang oras, gikan sa pagsilang sa adlaw hangtud sa pagsalop, way lain silang makita.

Apan ila rang panagway sa usa’g-usa. Unya gibasol ni Larry si Gina nga wa nagpahibawo daan nga may diperensiya sa taguangkan.

Ang kaminyoon namugna tungod sa gugma. Dapat mamunga ang gugma og anak nga angay sab nga higugmaon ug panggaon. Kun way bunga, ang gugma magkaawop ug moanam og kalaya.

Pakyas man si Chona sa iyang gugma, mas pakyas si Larry, kay wa siya’y anak. Si Chona daghang pag-umangkon nga giatiman. Usa man siya ka magtutudlo. Igo na lang siyang nanghupaw pagsaylo niya sa balay ni Larry. (Katapusan)