Rape victim
Gula 9
Nakahukom na g’yud si Lanie nga ikompisal niya kang Richard nga biktima siya sa pagpanglugos unya iyang napatay ang tawo nga miamong-among kaniya. Iyang tug-anan ang police detective nga siya maoy nagpatay niadto’ng tawo nga giputlan sa iyang ulo daplin sa sapa nga agianan paingon sa ilang balay sa Barangay Antuwanga.
Duha ka butang ang gihuna-huna ni Lanie nga mahitabo human niya matug-anan si Richard sa sekreto nga naglimin sa iyang pagkatawo. Una, mahimong dili na kini modayon sa tinguha niini nga maangkon ang iyang gugma kun masayud nga biktima siya sa pagpanglugos sa rapist nga iyang napatay.
Miabot sa huna-huna ni Lanie nga mahimo pa gani nga posasan dayon siya ni Richard kay mao kini ang gihatag nga misyon kaniya pagsulbad sa krimen ug ang pagdakop sa nagpatay sa maong tawo nga giputlan sa iyang ulo. Gamay ra kaayo ang tsansa nga mosabot si Richard sa iyang kahimtang.
Tuod, pagka Sabado sa buntag mipauli g’yud si Lanie sa ilang barangay sa bukid. Nagbilin na gani siya og tugon sa kauban niya sa trabaho nga basin og dili na siya makabalik kay adunay posibilidad nga dakpon siya ni Richard.
Pag-agi ni Lanie daplin sa sapa, gilingi niya ang kasagbotan nga bahin diin didto siya gipanamas-tamasan sa rapist ug iya kining napatay. Nanglugmaw ang mga lusok sa luha sa mga mata sa dalaga nga naghandom sa iyang mapait nga kaagi.
Wala siya mahimutang. Pag-abot niya sa ilang balay, naligo si Lanie sa tubod unahan sa ilang balay ug pagkahuman, mihigda siya hangtud nga giganoy sa katulogon. Napugwat na lang si Lanie dihang gipukaw siya sa iyang inahan kay miabot na si Richard. (Sumpayan)
- Latest