Goodbye Maricel

Gula 4

Gipanguyaban g’yud ni Albino si Maricel pinaagi sa text messages. Gusto ni Albino nga sugton siya ni Maricel pinaagi sa text aron nga kun magdeyt na sila, hingpit na nga sila manag-uyab.

Apan ingon sa nagdumili gayud si Maricel pagsugot kaniya. Igo lang kini nga mupasabot nga dili maayo nga sugton niya si Albino nga wala pa kini hingpit nga nakaila kaniya, apan mapugsanon si Albino.

Diha sa huna-huna ni Albino nga si Maricel aduna na’y kasinatian sa usa ka lalaki apan alang kaniya dili na mahinungdanon ang virginity niini’ng panahona kay ang importante mao nga magsinabtanay.

“Wala ako’y labot sa imong kagahapon kun kana maoy imong gikabalak-an Maricel,” matud ni Albino nga puwerte na g’yud nga pagka in-love ngadto sa higala niya nga maanyag.

Usa ka udto, gusto nga surpresahon ni Albino si Maricel. Wala pa’y alas 12 didto na siya sa abotanan nila nga fast food restaurant aron magkadungan na usab sila og lunch. Apan nabawo siya kay wala motunga si Maricel.

Iyang giteksan ug gipangutana kun hain siya. Duna diay lunch nga giandam sa ilang opisina kay birthday sa kauban ni Maricel. Huyhoy ang abaga ni Albino nga mibalik na lang sa iyang opisina.

Pagka gabii, nagteksanay na usab sila si Maricel ug Albino. Subli na usab niya nga gisukna si Maricel sa iyang gugma. Wala makaagwanta, gitawgan g’yud ni Albino si Maricel. Nagsalig nga pulos sila Sun subscriber, milanat og tulo ka oras ang ilang panaghinabi.

Hangtud nga napasugot gayud ni Albino si Maricel. Hilabihan ang kalipay ni Albino ug nagkasabot sila si Maricel nga manuroy atol sa iyang birthday inigka Sabado.

Naglaraw si Albino nga ipaila niya sa iyang mga ginikanan si Maricel. (Sumpayan)