Guwapa nga manager

Gula 3

Daw sangko sa langit ang kalipay ni Lester diha nga giingnan siya’s manager nga gidawat na siya sa giaplayan niya nga trabaho. “Salamat kaayo ma’am ha?”matud ni Lester nga mipasiklap sa ngalan sa manager diha sa ibabaw sa iyang lamesa.

“Pila ba ang suweldo nimo sa pagka bagger sa department store?” matud ni manager Glenna. Nagdiki-diki sa pagtug-an si Lester kay mauwaw siya nga motug-an kay igo ra g’yud intawon nakatungtong sa minimum nga suweldo.

Mipahiyom ang manager nga si Glenna kay nakabantay siya nga mauwaw si Lester nga motug-an sa iyang suweldo sa gitrabahoan niya nga department store.

“Lahi ka g’yud Lester niadto’ng duha nga nasundan nimo nga akong gi-interview kay sila nanghambog g’yud nga dagko og sweldo sa kanhi nila gitrabahoan aron nga kun madawat sila dinhi, dagko usab ang ilang suweldo,” matud ni Glenna.

Gipasaligan si Lester sa manager nga magbinuotan lang kay aron nga paspas ang iyang promosyon sa trabaho. Pagka karon, si Lester magsilbi ra usa nga typing clerk sa opisina sa manager.

Usa ka buntag, nalantawan ni Lester gikan sa bildo nga bung-bong sa opisina nga miabot na si manager Glenna ug daghan kini’g dala. Midali si Lester paggawas ug gitabangan pagdala ang manager sa iyang mga dad-onon.

“Kabuotan g’yud nimo Lester,” mipahiyom si Glenna. Milabay ang mga adlaw ug nasabtan ni Lester nga gaan kaayo ang pagtagad kaniya sa ilang manager. Hangtud nga nakurat na lang si Lester diha nga gipatawag siya ni Glenna. Gibalhin siya og trabaho sa pikas nga opisina nga si Glenna gihapon ang nagdumala. Assistant purchasing officer na si Lester ug usa na sa mga sinaligan sa manager.

“Gibutang ko ikaw diha sa mao nga puwesto kay hapit na moretiro sa serbisyo ang purchasing officer, ikaw na ang mopuli kaniya. (Sumpayan)