Driving teknik

Gula 7

“Tinuod ka Mar nga wala ka masuko diha’ng giangkon tika nga uyab? Gituyo nako kadto aron mosumbong ang ig-agaw sa akong bana ug maglagot ang akong ex,” ni Marie nga nagpahiyom.

Nakabantay sila nga nagsigi’g pasiklap kanila ang babaye nga ig-agaw sa kanhi bana ni Marie. Mora’g naniid. May nahuna-hunaan si Marie.  “Ayaw pagpalag Norman ha? Patuohon g’yud nato ang ig-agaw sa akong kanhi bana nga mag-sweetheart        ta.”

Mikuha og tissue si Marie ug gitrapohan ang singot ni Norman dapit sa agtang. Molihay unta ang driving instructor apan gibadlong siya ni Marie. “Ayyyyaw lagi pagpasabot. Inig panggawas nato, agbaye ko ha,” matud ni Marie sa hinay nga tingog.

Tuod, sa ilang pagpanggawas, gisinyasan ni Marie ang babaye nga ig-agaw sa iyang kanhi bana nga mouna ra sila’g biya. Wala moagbay kaniya si Norman mao nga napugos si Marie nga mogakus sa hawak ni Norman.

Nasiklapan ni Marie nga gisunod sila’g tan-aw sa babaye nga ig-agaw sa kanhi niya bana. Si Marie gihapon ang mi-drive sa kotse balik sa dakbayan sa Sugbo. “Sori kaayo Norman ha nga nagamit tika aron palaguton ang akong kanhi bana,” giingnan ni Marie ang iyang instructor.

“Sa akong giingon nga wala’y problema ug gikalipay pa gani nako. Kanindot man kun madayon,” matud ni Norman dungan sa tam-is kaayo nga pahiyom. “Wala ka pa ba’y asawa Norman?” sukna ni Marie.

Gipasabot ni Norman si Marie nga 28-anyos na siya apan nagpabilin gihapon nga ulitawo. May girlfriend siya apan nagbuwag lima ka buwan na ang milabay. “Kun mao, wala diay problema pananglit magkarelasyon ta. Okay ra nimo Man?” ni Marie.

Gihunong ni Marie ang kotse daplin sa karsada nga sakop na sa Barangay Tabunan. Milingi siya ni Norman ug nagkatinutokay sila’ng duha. Wala’y mga pulong nga migawas sa ilang mga baba, apan daw nagsultihanay ang ilang mga mata.

Anam-anam nga nag-abot ang masi’g nila ka mga ngabil. (Kataposan)