Driving teknik

Gula 5

Tibuok adlaw sila nga nag-uban si Norman ug Marie tungod kay gusto g’yud niya nga mabansay siya pagdali. “Maayo ka na man nga mo-drive Mar, dali ka ra nga nakat-on kay kursonada kaayo ka, dili ka hadlokan nga mosulod bisan sa mga busy nga karsada,” matud ni Norman.

“Ingna ang gitrabahoan nimo nga driving school nga ugma ang katapusan nga adlaw nga i-hire tika isip driving instructor,” giingnan ni Marie si Norman. Wala makatingog si Norman. Sa tanan niya nga mga nahimong estudyante sa driving, si Marie maoy labing paspas nga nakat-on sa pag-drive.

Giingnan ni Marie si Norman nga ugma gusto niya nga mobiyahe sila og lagyo aron mabansay siya pag-ayo. Nangaon sila sa usa ka kan-anan sulod sa SM mall sa wala pa sila mamauli. Alang kang Marie apil nga leksyon niya ang pagsubay sa nagtuyok-tuyok nga agianan paingon sa parking area nga atua sa third, fourth ug fifth floor.

Samtang nagpaabot sa giorder nila nga pagkaon. “Mingawon na diay ko nimo Mar kay ugma na man lang kaha kutob ang pagkuha mo nako isip driving instructor?” matud ni Norman samtang paraygon kaayo nga nagtutok kang Marie.

“Walay nagpugong nimo Norman nga mag-uban ta kun dili ka na nako driving instructor,” ni Marie. “Mao ba? Dili kaha masuko ang imong bana?” abtik nga tubag ni Norman kay nasiguro niya nga dili na dalaga pa ang iyang student driver.

“Wala na, buwag na mi Man. Ako na lang karon ang nagpadagan sa akong negosyo mao nga gusto ko makat-on pag-drive kay wala nay bana nga mohatud-kuha nako sa opisina,” giingnan ni Marie si Norman.

Wala makatingog si Norman pagkasayod nga buwag sa bana diay si Marie. (Sumpayan)