Chocolate

Misuroy si Larry sa kinaham niya nga department store sa downtown area sa dakbayan sa Sugbo. Iyang gikahimamat si Arante, ang labaw sa mga private detective sa mao nga tindahan. Gikaila ni Larry si Arante diha nga didto pa kini magtrabaho kaniadto sa nasunog nga tindahan sa Colon.

Nagkumustahay sila sa ilang panarbaho. Gitug-an ni Arante sa higala nga nagdugang sila og private detective kay midagsang ang pagpangawat sa milabay’ng mga buwan tungod sa grupo sa mga babaye nga maninipit.

Samtang sila nagsultihanay, gitawag si Arante pinaagi sa Paging System sa tindahan ug giawhag nga paadtuon dayon sa security office. “Kuyog usa ta sa akong opisina bai Lar kay adto ta didto magpadayon pagsultihanay, dugay na ta nga wala magkakita da,” ni Arante pa.

Pagtangka nila sa security office, gisugat siya sa iyang sinaligan nga detective. “May nasakpan mi Ran, usa ka dako nga chocolate ang gikuha,” matud sa detective ngadto ni Arante ug gitudlo ang batan-ong babaye nga naglingkod atubangan sa lamesa.

Naminaw ug naniid lang si Larry. Giimbestigar ang batan-ong babaye ug nasayran ni Larry nga taga Barangay Pasil ang babaye ug matud pa naibog kaayo siya sa chocolate mao nga hilom niya kini nga gisulod sa iyang bag.

Wala diay masayod ang babaye nga ang lalaki nga didto sa unahan nagbitbit og mga palitonon dili diay pumapalit, kundili usa ka private detective nga nakakita g’yud sa pagsulod niya sa bag sa chocolate.

Giimbestigar ang babaye ug mitug-an nga siya si Charisse, 19-anyos pa ang pangedaron ug anak lang og construction worker. Apan maayo’g panagway ang dalaga ug dili katuohan nga mangawat. Mihilak pag-ayo si Charisse ug mihukdong kini sa lamesa diha nga giingnan nga times ten ang presyo nga iyang bayran aron dili siya ipapriso. (Sumpayan)