Tagabukid lang gihapon
Nag-grocery si Janet sa Park Mall ning sayong kahaponon. Naka-parking iyang kotseng gisakyan sa kasadpang habig sa mall. Tungod sa beauty parlor nga ginganlan og Joven’s Salon. Nag-atubang sa parlor ang dong sa kotse nga Honda Accord nga maron. Si Henry ang drayber ni Janet.
Pagkahuman og pamalit ni Janet, gipanulod ni Henry ang mga plastic bag sa baggage compartment sa kotse. Unya, napikal si Janet kay may BMW nga asol nga nag-parking sumpot sa iyang kotse. Tinted ang windshield ug mga bintana sa BMW. Di makita kon may tawo ba sa sulod. Naalihan ang atrasanan sa Honda.
Nibagutbot si Janet ug lagsik iyang lakang padulong sa Joven’s Salon. Pagsulod niya, nangasaba dayon siya’s mga trabahante sa sulod.
“Hain ang inyong amo?” malagutong sukot niya ngadto sa babaye nga naglingkod sa counter. Wa katingog ang babaye. Nakalitan.
“Ingna na inyong amo ha! Nga di siya magpataka og parking! Nganong mosumpot man siya’g parking sa sakyanan nga nahimutang na daan sa parkingan?” ni Janet nga nagwarawara sulod sa parlor. Nakugang ug nanigang mga mata sa mga customer ug trabahante nga nag-atiman sa mga buhok o nawong sa mga customers.
Nituasik ang laway ni Janet. Nilisik ang mga balhibo sa iyang mga ilok nga lagum kay sleeveless man nga t-shirt iyang gisul-ob. Giparisan og short pants nga pakigol.
“Wa may sakyanan among amo! Wa sab nianhi karon!” tubag sa babaye sa counter.
Nitalikod og dali si Janet. Aron di makita iyang nawong nga naulaw. Ug sa paggawas niya nakita niya nga niatras na ang BMW nga nagsumpot sa iyang sakyanan. Wa diay nibiya sa kotse ang drayber sa BMW. Di lang makita kay tinted ang windshield.
Maid ug boy lang sila’s Janet ug Henry. Gikan sa probinsiya. Dihang gihatagan si Janet og kotse sa tiguwang foreigner nga nahimong umagad sa iyang amo, naistrikta ug nagarbosa si Janet. Si Henry nga nakat-on og drayeb, na-promote sa pagka-drayber.
Ang tiguwang foreigner dakong masakiton. Ug si Janet ang gihimong caregiver. Bisan giunsa ni Janet og pa-class og lihok, tagabukid lang gihapon og batasan. (Kataposan)
- Latest
