Isla Paraiso - Gula 240
“H-hasta sab ko, sister, nabalaka sa kahimtang karon ni SPO3 Corpuz,” nag-inartista si Benturada. “Kauban gud mi sa tanang operasyon. Kinsay dili mawili sa iyang kamaayong laki.”
“Husto ka, Benturada,” milaghaw ang tingog ni sister Veronica. “Usa siya ka tawo nga angay gayod kawid-an.”
Wala motingog si Benturada. Igo lang siyang mitan-aw sa madre.
Si sister Veronica usab daklit nga gipanag-iya sa kahilom. Mao ray iyang nahimo ang pagpasuroy sa iyang mga mata sa palibot sa sulod sa balay ni Benturada.
Unya, takulahaw lang, nasangit ang panan-aw ni sister Veronica sa usa ka butang nga nakadani sa iyang pagtagad. Dihadiha mitindog siya ug giduol ang nahimutangan sa maong butang. Gipunit niya ang maong butang nga gipatong sa tokador.
Gisid-ing ni sister Veronica ang kuwentas nga karon gigunitan na sa iyang tuong kamot. Dayon miatubang siya kang Corporal Benturada.
“Nakaila ako sa tag-iya niining maong kuwentas,” nagkanayon si sister Veronica nga miduol sa gilingkoran sa korporal. “Kang Rey kini dili ba, Benturada?”
“O-oo,” nagkabunga-bunga si Benturada sa pagtubag.
Nakita ni sister Veronica nga kalit lang nangluspad si Benturada. Naglikay na kini sa iyang tinan-awan. -- Sumpayan pa
- Latest
