Isla Paraiso

Gula 234

Niana dayong pagkagabii, pagtikyop gayod sa kangitngit sa kalibotan, mibiya si Rey sa pinuy-anan ni Corporal David Benturada. Sa gihapon, gibaoran ni Rey ang korporal nga dili mosugilon kang bisan kinsa mahitungod kaniya. Mipasalig ang korporal nga ang tanan mahimong usa ka sekreto nga sila lang ang nasayod.

Nagpahatod si Rey og taksi paingon sa Carbon. Sa gisul-ob niyang diyaket nga itom, dili mamatikdan nga may mga samad ang iyang kalawasan nga wala pa maalim sa hingpit. Wala pa gayod mobalik kaniya ang hingpit nga kabaskog sa lawas.

Midangop si Rey sa iyang higala nga nanag-iya og pump boat. Dili tiaw ang gibating kahikugang sa iyang higala pagkakita kaniya. Nakabalita diay kini sa iyang paglayas gikan sa tambalanan. Nabaniog sa tibuok dakbayan sa Sugbo ang iyang pagkagiw sa tambalanan.

Gipadayag gilayon ni Rey ang iyang tuyo ngadto sa iyang higala. Gusto siyang magpahatod niini ngadto sa Isla Paraiso.

Wala mobalibad ang iyang higala. Ug sumala sa gusto ni Rey nga niana dayong gabhiona gusto siyang mahiabot sa isla, gihatod siya sa iyang higala. Wala hatagi’g pagtagad ni Rey ang tun-og sa kagabhion sa ilang paglawig sa kadagatan tabok ngadto sa Isla Paraiso.

Maoy diha sa iyang hunahuna nga  makaabot gilayon sa maong isla. Didto unya sa maong isla, ilubong ni Rey sa kalimot ang tanang mga panghitabo nga miagi sa iyang kinabuhi. -- Sumpayan pa