Isla Paraiso

Gula 231

“Dili angay nga mabalaka si sister Veronica kanako, Benturada,” tubag ni Rey. “Buhi pa ko. Gawas pa, kinsa man ko nga iyang hatagan og pagpakabana.”

“Si Sir baya,” nakapahiyom si Benturada, “mura ma’g may dalang pangluod kanang imong sinultihan?”

Kahilom.

“Natural nga mabalaka gayod si sister Veronica, Sir,” ni Corporal Benturada pa, “mahitungod sa imong kahimtang. Managtrato gud kamo kaniadto.”

“Kaniadto ra kadto, Benturada. Giputol na niya ang among relasyon. Karon wala na siya’y labot sa akong kinabuhi. Dili na siya angay mabalaka bisan unsay akong dangatan.”

Ug nakita ni Corporal Benturada nga may mga luha ang namidpid sa mga aping ni Rey. Mibati’g kahibulong si Benturada sa iyang nakita.

 Karon pa niya nakitang mihilak si Rey. Ingon sa dili siya makatuo niini. Nakaila siya kang Rey. Isog kaayo kini sa natad sa panggubatan. Apan kamao diay usab mohilak ang tinugyanan sa balaud nga iyang gihimong idolo gumikan sa kamaayong laki niini.

Naluoy si Corporal nga nagtan-aw kang Rey. Karon may usa ka sihag sa kamatuoran nga iyang nakit-an. Natugkad niya nga nagpuyos og kahiubos si Rey ngadto kang sister Veronica. Gisakitan kini sa ilang panagbulag. -- Sumpayan pa