Pitaka nga kinit-an - Gula 7

Pag-off na ni Andro sa trabaho, wala siya maglangay, migawas dayon siya sa opisina ug nag-atang og taksi paingon sa Labangon. Gusto si Andro nga madali siya pag-abot ug magkita dayon sila si Katryn.

Giteksan niya si Katryn ug giingnan nga nag-taksi ra siya paingon sa Labangon. Layo pa gani ang taksi, namay-ongan na ni Andro ang bayhon ni Katryn nga nagtindog ilawom sa skywalk. Nag-atang nang daan si Katryn sa pag-abot ni Andro.

Paghunong sa taksi duol sa gitindogan ni Katryn, nanaog si Andro ug gipauna pagpasakay si Katryn sa likud nga lingkoranan. “Suroy usa ta sa mall,” matud ni Katryn. “SM ta bai,” giingnan ni Andro ang drayber.

Samtang nagdagan ang taksi, nagtinutokay sila si Andro ug Katryn didto sa likud nga lingkoranan apan wala’y mga pulong nga gilitok sa ilang mga ngabil. Gipig-it ni Andro ang kamot ni Katryn. Gipasagdan ra usab siya ni Katryn. Nasabot ni Andro nga gimingaw usab kaniya si Katryn kay kapin sa duha ka semana nga wala na sila magkakita. Pagkanaug nila sa taksi, wala na magpangikog pa si Andro nga migunit sa kamot ni Katryn.

May mga higayon nga agbayan sa daklit nga higayon ni Andro si Katryn sa ilang pagsuroy-suroy. Unya, nanulod sila og kan-anan. Ilang gipili ang kan-anan nga dili kaayo daghan og kustomer.

Didto nakahigayon si Andro. Gitutokan niya si Katryn ug giingnan “I love you.” Mipahiyom si Katryn nga mitutok kaniya. “Ako’ng gihuna-huna Andro nga kun sugton ko ikaw, ang atong gugma naggumikan lang sa pitaka nga pinunitan.”

Nakapahiyom ‘sab si Andro. “Bitaw no, apan sayop ba kun ang atong panagkaila ug panagrelasyon naggumikan sa pitaka nga pinunitan? Dili man tingali?” nagpahiyom si Andro nga migunit sa kamot ni Katryn.

“I love you too Andro. Na-miss na bitaw tika Andro. Wala g’yud ko makasabot ngano nga gimingaw ko nimo pag-ayo,” ni Katryn.

“Mao ba? Susama diay ang atong gibati kun mao kana Kat. Mahimo’ng tagbawon nato ang atong kaugalingon karong gabhiona,” giingnan ni Andro si Katryn. Miiknat ang kilay ni Katryn apan mipahiyom kini ngadto ni Andro. Nasabtan niya ang buot ipasabot ni Andro kaniya.

Human sa ilang pagpangaon, nanggawas sila sa mall ug misakay’g taksi. Samtang nagdagan ang ilang gisakyan, nagsugod na si Andro sa pagpabatyag og parayeg ngadto ni Katryn. (Kataposan)