Isla Paraiso

Gula 218

Ang mga tinugyanan sa balaud wala makalihok. “Ibutang kanang inyong mga armas!” Miusab pagmando si Col. Villadar. “Uno...! Dos...Tres...”

“Men, tumana ang iyang gisulti,” namulong si Capt. Benale. “Nameligro ang kinabuhi ni sister Veronica.”

Ibutang na unta sa mga tinugyanan sa balaud ang ilang mga armas aron pagtuman sa gimando ni Col. Villadar sa dihang milanog ang usa ka masipang buto. Ang koronel naigo diha sa iyang bagulbagol ug dihadiha nahagba kini sa salog. Nabuhian niini si sister Veronica.

Ang mga polis, lakip si sister Veronica, mipasuroy sa ilang mga mata sa palibot sa underground aron pagpangita sa nagpusil kang Col. Villadar. Maoy nasikop sa ilang mga mata si Rey nga naghay-ad ibabaw sa mga kahon sa serbesa nga naggunit ang tuong kamot sa pistola--kadtong pistola nga iyang gisuksok sa iyang hawakan. Nakita nila nga nabuhian ni Rey ang armas nga gigunitan dungan ang pagtuay sa iyang ulo.

Midali pagduol si sister Veronica kang Rey. Misunod sila si Capt. Benale ug Corporal Benturada sa madre. Ang ubang mga polis misuhid sa palibot aron pagtino kun wala na bay mga kaaway nga nagpabiling buhi.

Gimandoan gilayon ni Capt. Benale si Corporal Benturada sa pagtawag og ambulansiya dihang iyang nasuta nga nagpitik pa ang pulso ni Rey. -- Sumpayan pa