Pitaka nga kinit-an

Gula 2

Human masuhid ni Andro ang tibuok second floor sa department store ug wala niya igkita ang babaye nga diha sa hulagway sa pitaka nga iyang napunitan, misaka na usab si Andro sa ikatulo nga andana.

Gipatuyhakaw ni Andro ang iyang liog aron malantaw niya bisan sa unahan ang mga babaye ug mailhan niya ang anaa sa hulagway. Tuod, may nahuna-hunaan si Andro. Midali siya pagkanaug sa groundfloor.

Giduol niya ang guwardiya nga nagbantay sa main entrance. Gipakita niya ang hulagway sa babaye nga diha sa pitaka. Gipangutana niya kini kun may nakita ba nga babaye nga susama og hitsura.

Giingnan ni Andro ang guwardiya nga kun makahimungawong kini og babaye nga kaamgid ang hitsura sa hulagway, ipapangutana kun wala ba siya mawad-i og pitaka.

Human kapasidan-i ang guwardiya nga mobalik ra siya, misaka si Andro pagbalik sa third floor sa department store. Dayon miadto si Andro sa food court sa ika-upat nga andana. Gikapoy na siya mao nga miorder siya’g mango shake.

Mipili si Andro og bakante nga lamesa nga layo ra sa ubang mga customer nga nangaon. Human makainom og shake, gibuksan ni Andro ang pitaka nga iyang napunitan.

Wala g’yud siya masayop nga sapian ang mao nga babaye. Kapin sa P20 mil ang sulod sa pitaka ug adunay daghang bank cards ug mga credit cards. Gihiling pag-ayo ni Andro ang mga ID.

Ang usa ka ID sa Professional Regulations Commission (PRC) nagpakita sa ngalan sa mao nga babaye nga diha sa hulagway. Sa laing ID, adunay numero sa selpon mao nga iya kini nga gitawgan.

Babaye ang nakatubag. Gisukna ni Andro kun may nailhan ba kini nga Katryn nga maoy diha sa ID. “Yes, may amiga ko nga si Katryn, why man?” matud sa nakatubag ni Andro.

Gitug-anan ni Andro nga napunitan niya ang iyang pitaka. Mipasalig ang babaye nga kontakon dayon niya ang iyang amiga nga si Katryn. Nalipay si Andro kay makuha na g’yud pagbalik ni Katryn ang iyang pitaka.

Taud-taud, mi-ring ang selpon ni Andro. Babaye ang nanawag kaniya ug lahi nga numero. (Sumpayan)