Bar girl - Gula 4

“Suroy baya sa bar unya’ng gabii Delfin ha?” matud ni Leny sa dayon na niini’ng tabok sa karsada. Gisundan paglantaw ni Delfin ang nag-ikid-ikid ug igwad kaayo’ng sampot ni Leny. “Hayahaya nimo part uy, paadtuon ka man ni Leny sa bar unya. Nakagusto g’yud na nimo part,” matud sa tindero’g puto-maya.

Tuod, pagkagabii na, wala g’yud sipyata ni Delfin ang pag-adto sa Wild Orchids Bar nga gitrabahoan ni Leny. Nangutana usa si Delfin sa guwardiya kun tinuod ba nga dunay Leny nga nagtrabaho sa mao nga bar.

“Cashier namo na siya bai, dili na dancer,” matud sa guwardiya. Mora’g nahilaw ang panagway ni Delfin. Mipadayon siya pagsulod. Pagtangka g’yud niya sa pultahan, gideritso ni Delfin ang iyang panan-aw sa cashier’s booth. Wala gayud siya masayop, si Leny ang naglingkod atubangan sa cash register machine. Milingkod siya sa bakante nga lamesa duol sa nahimutangan ni Leny. Giduol si Delfin sa usa ka waiter ug miorder siya’g duha ka botelya nga beer.

“I-regards ko sa inyong cashier bai,” giingnan ni Delfin ang waiter. Tuod, giduol sa waiter si Leny ug giingnan nga adunay nang-regards kaniya. Milingi si Leny ug gitan-aw ang lamesa nga nahimutangan ni Delfin.

Mipahiyom si Leny nga nakakita kang Delfin. Nagpabanos kini sa kauban niya nga kahera ug miduol kang Delfin. “Maayo kay miari ka g’yud Delfin,” matud ni Leny nga milingkod sa atubangan nga lingkoranan.

“Abi ko ba og bar dancer ka Len, cashier ka man diay,” matud ni Delfin nga nagpahiyom. “Ayaw’g saba. Mi-graduate na ko diha sa stage Delfin. Duna ko’y itug-an nimo ug mao kini ang rason ngano nga gipaanhi tika karon,” ni Leny.

Ingon sa nahibulong si Delfin kun unsay  itug-an ni Leny kaniya. “Naibog kanako ang anak sa tag-iya niini’ng bar, si sir Wendel. Gusto g’yud siya nga makigdeyt nako apan mibalibad ko ug akong giingnan nga masuko ang akong boyfriend,” saysay ni Leny.

Igo lang miyango-yango si Delfin samtang panagsa nga motungab sa botelya sa beer. “Gusto ko Delfin nga ipatuo nato sa akong mga kauban nga ikaw ang akong boyfriend aron nga dili na magsamok kanako si sir Wendel,” matud ni Leny. (Sumpayan)