Romansa ug pag-eskuwela
Gula 6
“Abi mo Wen, sa imong kabuotan ngari kanako, nakapahaling kini og agipo sa tim-os nga magmahal sa dabong pa nako nga kasing-kasing ug ang iyang dinagaang maoy naghatag kanako og kaisog aron ka daygan sa akong paghigugma kanimo,†giingnan ni Abel si Rowena.
Wala makapugong si Rowena sa pag-agik-ik kay klaro kaayo nga nahimuot siya sa iyang nadungog gikan ni Abel. “Karon pa ko Abel, gawas nga bright ka sa leksyon, balaknon ka pa g’yud diay nga manulti,†sa dalaga pa.
“Dili ako maantigo nga mobalak Wen, ang imong nabati mao ang mga pulong nga hinukad gayud gikan sa kinahiladmang lawak sa akong kasing-kasing aron masayod ka nga ikaw akong gimahal,†matud ni Abel. Tigbasahan si Abel sa libro sa balak sa iyang amahan mao nga sinati niya ang mga garay sa gugma.
Wala makatingog si Rowena nga igo lang mitutok ug nagpahiyom kang Abel. Gigunitan ni Abel ang tuo nga kamot sa dalaga. Nagkatinutokay sila’ng duha. “Wen, ari na mo si bai Abel kay mamahaw na kuno ta,†matud ni Lester nga maguwang-lalaki ni Rowena.
Sa kan-anan, nakabantay si Rowena nga nagpanagana si Abel sa pagkuha og sud-an nga linat-an nga manok nga gihugaw-hugawan og mga dahon sa kamunggay. “Mauwaw man lang gihapon ni si Abel uy bisan tulo ka adlaw ka na dinhi sa amo. Bi ako na la’y butang nimo og sud-an,†matud ni Rowena.
“Ako na lang Wen,†matud ni Abel apan nakabutang na si Rowena og mga hiniwa nga paa sa manok ug pitso ngadto sa plato sa ulitawo. Human sa ilang pagpangaon, giagda si Abel ni Lester nga mangadto sila sa ilang payag sa katubhan nila sa Barangay Sagay.
“Dili ko ninyo paubanon?†matud ni Rowena nga nakadungog. “Uban ka kay igo ra ko nga mokaon og presko nga butong didto unya moadto ko sa balay sa akong classmate sa eskena Lugo kay dugay na mi nga wala magkita,†matud ni Lester.
Tuod, human si Lester nakakaon og butong, nananghid kini nga biyaan nila si Abel ug si Rowena. Sa hilom, gikalipay kini ni Abel kay makahigayon na siya pagsukna sa gihalad niya nga gugma ngadto ni Wenna kaganina’ng buntag. (Sumpayan)
- Latest
