Isla Paraiso

Gula 199

Milungtad og napulog lima ka gutlo ang pagmaneho ni Rey sa sakyanan una pa siya mahiabot sa dapit nga gitug-an sa kidnaper nga maoy ilang gidad-an kang sister Veronica. Mingaw ang maong dapit nga na banabana ni Rey, nahisakop na tingali sa dakbayan sa Mandaue.

Wala’y kabalayan nga iyang nakita. Nalabyan niya ang dakong lote sa yuta nga gikoral sa alambreng tunokon diin sa sulod nahimutang daghang mga kahimanan sama sa bulldozer, grader, backhoe ug uban pang heavy equipments nga gipanag-iya sa Jenhan Constructions.

Gipangita gilayon ni Rey ang gihulagway sa kidnaper kaniya nga usa ka biniyaang bodega sa bugas nga gikoral sa hollow blocks.

Nakalabay pa si Rey og lote diin nahimutang ang daghang mga gubang sakyanan. Ngitngit na ang maong dapit. Mao na lay nagbanwag sa kalikopan ang mga suga sa mga poste sa elektrisidad nga taglagyo usab ang distansiya.

Sa unahan, nalantawan ni Rey ang usa ka koral nga molabaw tingali sa tawo ang gihabogon. Sa sulod niini, nagbuntaog ang usa ka karaang bilding. Nagsiga ang mga suga sa sulod sa maong bodega. Mao na kini ang karaang bodega, nagkanayon si Rey sa iyang kaugalingon.

Mihunong sa pagpadagan si Rey sa dyip nga gimaneho. Ang head light sa sakyanan didto moigo sa pultahang puthaw nga serado. Naghunahuna siya karon sa angay niyang buhaton. -- Sumpayan pa