Isla Paraiso

“Tungod kay si sister Veronica ang bugtong paon nga among ikabutang sa taga nga imong kubiton,” matud sa kidnaper.  “Ayaw gayod kamo pagkasayop sa pagpasakit kaniya,” mibahad si Rey sa tumang kamalagoton. “Kun may buhaton kamong daotan kaniya, dili ko binlan og kinabuhi lakip ang inyong anino.”

“Hinayhinay lang sa imong sinultihan, SPO3 Corpuz,” matud sa kidnaper. “Wala ka sa hustong posisyon aron mosulti ka og ingon niana. Hinumdomi nga kami ang naggunit sa alas. Ania sa among mga kamot ang babaye nga imong gimahal -- si sister Veronica.”

Mihunong sa pagsulti ang kidnaper. Unya, pagkataodtaod, mao nay nabati ni Rey ang tingog ni sister Veronica diha sa telepono.”

“Rey...” nagkurog ang tingog ni sister Veronica.

“S-sister Veronica,” ingon sa may mihuot sa ginhawaan ni Rey pagkadungog niya sa tingog sa madre. “H-hain ka karon? Unsay ilang gibuhat kanimo?”

“Re-Rey, pag-amping...”

Ug wala na mabati ni Rey ang tingog sa  madre nga nakigsulti kaniya kaganina.

“Unsay gibati mo, SPO3 Corpuz, karon nga nadungog mo na ang tingog sa babaye nga imong gimahal?” -- Sumpayan pa