Isla Paraiso

Gula 191

Sayon rang nadala sa mga tawo ni Col. Villadar si sister Veronica.

Gidala nila ang madre sa rest house sa koronel.

Ang maong hitabo gitaho gihapon sa madre superyor ngadto sa kuwerpo sa kapolisan. Si Corporal Benturada nga maoy nag-duty niadtong gabhiona maoy nakadawat sa tawag sa madre superyor. Human sa panagsulti sa duha, ang korporal mitawag gilayon sa cellular phone ni SPO3 Rey Corpuz nga niadtong higayona didto na sa balay nga giabtan niini sa Mambaling.

“Sir, si Corporal Benturada kini,” nagkanayon ang korporal.

“Oo, nganong nanawag ka man niarong orasa sa kagabhion?” nagkanayon si Rey didto sa pikas linya.

“May daotang hitabo, Sir,” ni Benturada.

“U-unsa?”

“Nanawag diri sa kuwerpo dili pa lang dugay ang madre superyor sa Orchids Sisters Convent,” misugilon si Benturada. “Gitaho niya kanako nga gikidnap kuno si sister Veronica sa wala hiilhing mga tawo!”

“H-ha?”

“Mao kana, Sir. Gidala kuno si sister Veronica sa armadong mga tawo. Nagtuo ang madre superyor nga may daotang tuyo ang mga tawo sa madre.” Wala makatingog si Rey. -- Sumpayan pa