Biyahe sa Manila

Gula 2

Nasayran ni Alex nga kanunay diay si Janet nga mag-adtoan sa Manila kay liaison officer kini sa tindahan og mga armas nga ania magbase sa Sugbo ug siya maoy moasikaso sa lisensya didto sa Camp Crame.

Naikag kaayo si Alex pagkasayod sa trabaho ni Janet. “Makigkita ka ba ni Chief Superintendent Louie Oppus? Siya man maoy hepe karon sa Firearms and Explosives Office sa Camp Crame,” giingnan ni Alex si Janet.

“Yes, adto man g’yud ko sa iyang opisina mo-transact. Kaila mo ni General Oppus?” bawos-pangutana ni Janet. Gitug-anan ni Alex si Janet nga nahigala niya si General Oppus diha’ng dinhi pa kini sa Sugbo madistino.

“Maayo kay nagkaila ta Janet, ako diay nga ipa-asikaso nimo ang akong Permit to Carry Firearms Outside Residence kay mo-expire na hapit,” matud ni Alex. Ingon sa nahanaw na ang kaikog kanila’ng duha. Susama na sila sa karaan nga managhigala. Hapit na motugpa ang plane nga ilang gisakyan. Maila kini kay samtang kaganina nagtungas ang abyon, karon ingon sa naglugsong na. “Problema ko karon Jan kay first time pa nako kini nga pag-anhi sa Manila nga ako ra, wala pa kaayo ko masuheto,” giingnan ni Alex si Janet.

Gitug-anan niya si Janet sa lugar nga adto siya motambong og seminar. “Uy, duol ra man kana sa US Embassy Office. Dili ra ‘sab na layo sa akong gipuy-an nga apartment,” matud ni Janet.

Ingon sa nalipay si Alex kay gipasaligan siya ni Janet nga tabangan. “Kana’ng hotel nga anha mo mag-seminar, atbang g’yud na sa US Embassy Office. Ubanan na lang tika aron maka-check-in ka dayon,” ni Janet pa.

Pagtugpa sa plane nga ilang gisakyan, wala na sila magbuwag. Kanunay gani nga nagpasiplat kanila kadtong lalaki nga ilang katupad nga nakabantay nga nagkasuod dayon sila.

Nagsunod-sunod lang si Alex kang Janet. “Ari ta mosakay og taksi sa gawas sa airport kay pangayoan ka’g mahal kun anha ka mosakay sa sulod,” matud ni Janet.

“Roxas Boulevard tayo, sa harap ng US Embassy ,” giingnan ni Janet ang drayber. Paspas nga mipadagan ang drayber ug wala madugay, gisinyasan ni Janet ang taxi driver nga mosulod sa entrance sa hotel.  Gibayran ni Alex ang drayber ug nanganaog sila si Janet. “Mao ni ang hotel nga imong giingon nga anhi mo mag-seminar Lex,” matud ni Janet. Gialalayan ni Janet si Alex sa pag-check-in.

“Huwata lang ko kadiyot dinhi sa lobby Jan, mag-dinner na lang ta,” giingnan ni Alex ang dalaga. – (Sumpayan)