Isla Paraiso - Gula 126

Sunod sa mando ni Rey, mihinay sila pagpaduol sa habog nga koral nga semento sa hide out sa mga tulisan. Ang maong hide out gilubloban sa kahilom ug kangitngit. Mamingaw usab ang dapit. Ang mga residente nga nanimuyo duol sa maong karaang bodega wala nay timik.

Nakahimo pagpaduol ang mga tinugyanan sa balaud sa koral nga semento sa karaang bodega nga wala’y nakamatikod. Naniid una sila. Ilang gisuta kun wala bay guwardiya sa maong hide out nga nagmata pa niadtong tungora.

Apan ang palibot giharian sa tumang kamingaw. Nasuta ni Rey nga wala gayo’y nagbantay sa pultahan sa  habog nga paril nga semento.

Ingon sa nagpanikad na si Rey. Dili na siya makapaabot sa paghagtok sa alas dose sa tungang-gabii nga sumala kang Capt. Benale maoy maayong takna nga i-atake. Gusto na siyang mosud sa hide out sa mga tulisan.

Nakahukom si SPO3 Rey Corpuz nga sudlon na nila ang karaang bodega nga gihimong hide out sa mga tulisan. Dili na siya makapaabot sa oras nga gisugyot ni Capt. Sancho Benale nga maoy ilang i-atake. Dugay pang hunahunaon ang alas dose sa tungang gabii. Mingaw na ang palibot busa mahimo na nilang sudlon ang hide out nga gilubloban sa mga tulisan. -- Sumpayan pa