Mother lover

Duha ka bulan nga textmate ni Gina si Lloyd. Nagkauyab sila sa teksanay lang. Unya nagkasuod sila’g maayo kay nagkakitaay na sila’s ilang mga hitsura sa Internet. Nila pa parison sila kay guwapo ug guwapa sila. Unya nagkasabot nga mag-eye ball.

Sa unang date nila, nagkita sila sa Park Mall. Sa usa ka boutique, gipamalitan ni Lloyd si Gina og   mahalong mga sinina ug bistida. Singkuwenta mil ang nagasto ni Lloyd. Wa kabalibad si Gina. Kay gusto sab siyang makapahimulos sa kaadunahan ni Lloyd. Only child si Lloyd. Unya ang negosyo sa iyang mga ginikanan chain of restaurants sa tanang dakbayan sa lalawigan sa Sugbo. Samtang si Gina, nakahuman la’g kursong B.S. Psychology ug nag-alagad sa call center. Jackpot para ni Gina nga nakauyab siya’g adunahan.

Nakauyon pa si Gina sa unang mga gipamalit ni Lloyd nga mga sinina para niya. Unya sa sunod nga mga pamalit ni Lloyd, mga sinina sa matrona ang iyang gipamalit. Naglibog si Gina. Tiniguwang ang mga sapot nga gihatag ni Lloyd. Unya gipasul-ob gyud ni Lloyd ang pinakanindot sa panan-aw sa ulitawo.

Tungod sa pagmahal sa uyab, gipatumanan ni Gina ang gusto ni Lloyd. Mora’g tiguwang babaye si Gina sa iyang gisul-ob. Unya gidala siya ni Lloyd sa usa ka beauty parlor nga mahalon. Nagdala si Lloyd og usa ka litrato sa babaye nga colored. Iyang gimandoan ang manedyer sa beauty parlor nga ipakopya ang litrato. Iyang pabutangan og make-up ang nawong ni Gina aron mapareha sa litrato sa babaye nga mas matured ug mas tiguwang.

“Kinsa man ning naa sa litrato?” ni Gina nga naglingkod na sulod sa beauty parlor.” Ako nang mommy,” ni Lloyd.

“Hain na man ni imong mommy?” ni Gina.

“Wa na ko kahibawo,” ni Lloyd.

“Nganong wa ka man kahibawo?” ni Gina.

Nagbuwag man sila’s papa. Unya gimingaw na kaayo ko sa akong mommy,” ni Lloyd nga nagtibi.

Nidali’g tindog si Gina. Nidagan pagawas sa parlor. Nipara og taksi. Nagdali siyang nisakay sa taksi. Wa na gyud siya pakita pa ni Lloyd. Giilisan niya ang iyang simpak sa selpon. Nagpalimod na siya sa opisina kun motawag si Lloyd. Nagpasalamat si Gina nga wa  pa gyud kaadto si Lloyd sa iyang gitrabahoan ug sa iyang pinuy-anan. Natataw niya nga may diperensiya sapangutok ang iyang nauyab. Delikado’g mograbe, unya siya ang mapasanginlan sa hinungdan. Kay niprangka si Lloyd niya sa pag-ingon, “I cannot be sexually aroused unless you dress and look like my mother.” (Kataposan)