Wrong number - Gula 7

Misamot pa g’yud ang kasuod nila ni Nards ug Nanet. Tungod sa kalit nga pagbisita ni Nards sa iyang gwapa nga amiga, wala na dayon kini molakaw. 

Nagkalingaw sila pagsultihanay. Dihang hapit na ang tingpaniudto, giagni ni Nards ang dalaga nga adto sila mangaon sa gawas unya inigkahuman manuroy.

“Sige Nards, enjoy g’yud ko basta kauban ta kay busog ko pirmi,” matud ni Nanet nga daw nangomedya. “Ingon usab niana ang akong bation Netz kun magkuyog ta, mora ko’g gituboy sa langit sa kalipay,” ni Nards.

Pwerte nga nakakatawa ni Nanet nga nakadungog. Nabantayan ni Nards nga komedyante ‘sab diay si Nanet. Mora’g nahanaw ang iyang kauwaw sa dalaga.

Naglungot-lungot na g’yud si Nards nga tug-anan si Nanet sa iyang gibati. Naghuwat na lang siya og maayo nga higayon. Misulod sila’g kan-anan, nangaon.

Human sila makakaon. “Nganong sayo ka man kaayo miadto sa akong gipuy-an?” pangutana ni Nanet. Natan-aw ni Nards nga kini na ang tukma’ng higayon.

“Dili ko mahimutang nga samokon kanunay sa grabeng kamingaw kanimo Netz. Ang akong kasing-kasing naghagawhaw sa akong dunggan nga gimahal ko ikaw,” ni Nards.

Wala makatingog dayon si Nanet. “Tinuod ka? Nagbinuang ka lang no? Imo ra ko’ng gibinuangan,” matud ni Nanet.

“Wala ko magbinuang nimo Netz. Gusto na unta ko nga mag-ilis og bag-ong numero sa akong selpon, apan nausab ang akong huna-huna kay kini ang hinungdan sa atong panagkaila.”

Nagtinutokay sila’ng duha. Taud-taud. “Angkonon nako Nards nga dali ra ‘sab kaayo ko nga nakakat-on pagmahal kanimo. Sama nimo, swerte usab kaayo kining akong selpon kay tungod niini, nagkaila ug nagkakita ta. I love you too Nards.”

Gihadla sila sa kalipay sa usa’g-usa apan pinugngan ang ilang pagbati kay diha sila sa kan-anan. Taud-taud, nanggawas sila sa kan-anan.

“Adto na lang ta sa akong gipuy-an kay nag-text ang akong amiga nga moadto siya karong hapon,”ni Nanet. Tuod, namalik sila sa balay.

Didto nakahigayon sila sa pagparayganay sa unang higayon. Sila ra’ng duha kay misimba ang ubang nag-estar sa kasikbit nga kuwarto.

Nabantayan ni Nards nga mora’g uhaw na sa parayeg sa lalaki si Nanet. Sama kaniya, taud-taud na nga wala na siya makaparayeg og babaye.

Nagparayganay sila’ng duha ug nagkainit ang ilang mga pagbati. Takulahaw lang nga nahilom ang tibuok lawak. May nanuktok sa gawas. Miabot na ang amiga ni Nanet apan wala kini tagda sa dalaga ug gipadayon nila ang mainiton nga romansa. (Kataposan)