Wrong number

Gula 5

Sulod-gawas sila si Nards ug Nanet sa lainlaing mga botique ug sa SM department store. Dihang gipul-an na tingali sa pagsigi’g suroy misulod sila og restaurant. Human sa ilang first-dinner, nag-iya-iya sila pagpauli.

Pag-abot ni Nards sa iyang gipuy-an, taud-taud mitingog ang message alert sa iyang phone. Text diay kini gikan ni Nanet ug nagpasalamat pag-usab ni Nards nga gipalitan siya’g mahalong perfume sa bag-o niya nga amigo.

Wala na lang kini tubaga pa ni Nards. Apan pagkataud-taud, mitawag na g’yud si Nanet. Nagsalig kini nga Globe Duo ang iyang phone ug dili siya makabayad og daku bisan og magbuntag pa’g gamit sa iyang selpon.

Taud-taud gayud ang ilang panagsultihanay ni Nards ug Nanet. Bisan unsa na lang ang ilang gipanagsultihan. Nakapasamot pa gayud kini sa ilang panagsuod. Hangtud nga mitug-an na si Nanet sa dapit nga iyang gipuy-an.

Ganina sa ilang panagkita, wala pa motug-an si Nanet kun asa siya magpuyo. Wala pa usab kini motug-an kun unsay iyang trabaho. Gitug-anan si Nards ni Nanet nga kadtong usa sa tindahan sa SM nga ilang gisudlan kaganina atua siya magtrabaho. Nakabantay bitaw si Nards nga gitimbaya pag-ayo si Nanet sa mga kawani sa tindahan nga mora’g dugay na sila nga nagkaila. Nagtoo si Nards nga suki lang si Nanet didto.

Gipalakbitan ni Nards sa paghisgot ang kabahin sa love life sa dalaga. “Maayo kay nakalugar ka pagsuroy kaganina Netz nga wala ka pangitaa sa imong boyfriend?”

“Zero balance na ko karon Nards. Nagbuwag na mi ug ang akong boyfriend, nangita pa ko,” ni Nanet pa nga mora’g mipahiyom. Naikag si Nards nga naminaw sa dalaga. “Kun mao kana Netz, may purohan pa diay nga makadama,” pasumbingay ni Nards.

Nakasabot si Nanet sa buot ipasabot ni Nards, apan nagpatuso-tuso siya. “Unsay buot mo’ng ipasabot sa makadama?”

Gipaagi ni Nards sa komedya ang iyang tubag. “Familiar ba nimo ang kanta ni Max Surban nga dunay linya nga nagkanayon nga makadama sa imong gugma?”

Pwerteng nakakatawa ni Nanet. Nagkataw-anay silang duha. “Ikaw Nards, daghan ka g’yud tingali’g girlfriend kay hitsuraan ka man,” bawos-pangutana sa dalaga. Dugay nga nakatubag si Nards. Mauwaw siya nga motug-an nga na-zero ‘sab siya karon. Walay uyab. Apan nahuna-huna niya nga mas maayong tug-anan si Nanet nga wala na usab siya’y girlfriend.

“Mobisita unya ko diha sa imong gipuy-an Netz atul sa imong day-off,” matud ni Nards. Dali kaayo nga nakatangdo si Nanet ug mitug-an sa adlaw nga wala siya’y trabaho. - Sumpayan