Isla Paraiso - Gula 46

Buot si Rey makigsulti kang sister Veronica. Apan unsaon nga dili na man kini makigkita kaniya? Nga dili na man kini moatubang kun mamisita siya. Gipaspasan pag-inom ni Rey ang serbesa hangtod nga nahurot niya ang upat ka botelya. Mi-order siya’g laing upat pa ka botelya. Miinom siya ug miinom. Pagkahurot sa iyang gi-order, mi-order na usab siya’g laing tulo pa ka botelya. Miinom pa gayod siya. Hangtod nga mibati nag kabungog ang iyang ulo.

Mitindog si Rey gikan sa iyang gilingkoran. Mihana siya pagsarasay apan nakadali siya paghinimbang. Gibati niya nga nagduogduog ang iyang ulo gumikan sa kadaghan sa iyang nainom.

Migawas siya sa imnanan nga nagsusapinday sa paglakaw. Misugod na pagpangatagak ang mga lugas sa talisik niadtong tungora. Nagpangilat ang langit. Ingon sa may taliabot nga makusog nga ulan.

Mipara si Rey og taksi. Paghiluwan niya, iyang giingnan ang driver nga magpahatod siya sa Orchids Sisters Convent. Mitando ang gulangon na nga driver ug misugod gilayon pagpadagan sa sakyanan.

Nagpiyongpiyong si Rey samtang nagdagan ang taksi nga iyang gisakyan. Apan sulod sa iyang hunahuna naghamok si Veronica. Oo, kinahanglang magkasulti gayod sila si Veronica. Dili siya mahimutang kun dili niya makasulti ang babaye. -- Sumpayan pa