Dili mobiya

Dear Tita Salie,

Maayong adlaw. Just call me Roxcel, 23 years old ug usa ka lesbian. Ang akong problema kabahin niining akong uyab nga usa ka babaye.

Medyo nakonsensiya man god ko, Tita, tungod kay duna man siya’y pamilya ug mga anak. Ug akong nasayran nga tungod kanako na walay klaro ang ilang pagpuyo. Mao nga mangayo ko og tambag kanimo kun unsay dapat nakong buhaton niini.

Nibiya man god sa iyang pamilya ug mianhi kanako. Siya mismo ang mi-offer nga makig-live-in kanako kay kuno wala na siya’y gugma sa iyang bana. Matud niya nga dili na siya happy sa iyang kaminyoon ug dili na siya kontento sa iyang bana.

Love baya nako siya, Tita, ug love pod kaayo ko niya. Ako  na siyang giingnan nga magbulag na mi og maoy akong gusto nga mobalik na siya sa iyang tinuod nga pamilya kay lagi naluoy ko sa iyang pamilya ug makonsensiya nako. Apan unsaon ko man kini nga bisan unsaon nako siya og sulti dili man gyod siya mobiya.

Love gyod kuno ko kaayo niya. Mohilak gyod siya, Tita, kun akong ingnon nga magbulag na mi kay may pamilya siya. Pero sa tinuoray dili pod unta ko gusto nga mawala siya kanako kay mahal na man pud kaayo nako siya, pero nakonsensiya lang gyod ko. Unsa may akong buhaton? Palihog pasabta ko. Thank you very much and God bless you always.

* * *

Dear Roxcel,

Naka-admire ko sa imong kaayo ug sa imong pagkamahuna-hunaon sa uban. Mao seguro kini ang hinungdan kun nganong ganahan kaayo nimo kanang babaye nga minyo nga nalambigit kanimo karon. Tingali kun wala kini mohatag sa iyang bana kaniya ang attention nga iyang gipangita nga sama sa imong gipakita kaniya. Basin kun sobra ka kugihan ang iyang bana ug nagpunay na lang kini og trabaho hangtod iyang makalimtan nga duna pa siya’y asawa nga nagkinahanglan sa iyang attention tungod kay mao man gyod kini kanunay ang hinungdan sa walay maayong pagtinagdanay sulod sa panimalay.

Kun kaya nimong pakig-estoryahan ang iyang bana buhata kini. Ihatod siya sa ilaha aron pagmatuod sa imong paghunahuna sa iyang pamilya. Kun lisod duolon ang iyang bana kay nasuko siya kanimo kanang babaye lang ang pasabta’g maayo. Ayaw na ipadayon ang imong gugma kaniya. Tabangi siya nga mobalik siya sa ilang balay tungod kay dunay mga anak nga nagkinahanglan kaniya.

Likayi na lang siya ug ayaw na hatagi og higayon nga moanha pa siya nimo. Bisan sakit sa imong dughan, bisan maluoy ka niya apan buhata kini tungod ug alang sa iyang pamilya. -- Tita Salie