Isla Paraiso

Gula 33

Ang hunahuna ni Rey daw nagkawot og lungag nga gilubngan sa usa ka kasulatan nga mopadayag sa tanang kamatuoran.

Hangtod nga nahinumdoman ni Rey kun diin niya makita ang maong tawo. Ug aron gayod pagseguro nga husto ang iyang katahap, gipakli niya ang sunod nga papel ug hangtod ang ikatulong papel. Ug nasuta niya nga wala gayod siya masayop sa iyang pagtuo. Ang tulo ka hulagway nga gipapilit sa mga papel nga gisulod sa folder nga iyang gikuptan mao ang mga hold-aper nga mitulis unta sa usa ka bus depasaheroan nga iyang napatay kagahapon diin ang usa kanila buot untang molugos kang sister Veronica.

Apan kalit si Rey nahatiurok sa dihang misantop ang ngalan ni sister Veronica sa iyang hunahuna. Oo, si sister Veronica, ang kanhi Veronica nga iyang gimahal nga karon usa na ka madre. Siya ang Veronica nga gisimba niya -- ni Rey -- ang nagbanaag niining katahom ug iyang gihigugma sa tiunay.

Dili tiaw ang gibati niyang kalipay karon nga nag-abot pag-usab ang ilang duha ka dalan. Ug niining higayona, lahi na ang hagit nga iyang atubangan. Gidawat niya ang maong hagit.

Unya kalit siyang mitindog gikan sa iyang gilingkoran.

Giduol ni SPO3 Rey Corpuz si Corporal David Benturada sa nahimutangan niini. Naglingkod ang korporal atubangan sa lamesa nga gipatungan sa makinilya samtang nagpunay og dukdok sa mga tekla niini. -- Sumpayan pa