Kinanindotan nga pinaskohan

Sukad nabalita sa mga mantalaan, ang pagkahagba sa AIG, usa sa mga dagku’ng kompaniya sa paniguro; naglaoy ang pangahente ni Reming. Taliabot na lang ang kasaulogan sa Pasko, wala gihapon siya kakuha og bag-ong kliyente nga magpasiguro. Gibati siya karon og kahingawa nga wala siya’y ikahatag nga gasa sa iyang asawa karong paskoha. Ang iyang pensiyon sa SSS nga P2,750 matag bulan kulang ra sa mga tabletas nga imnunon ni Titing.

Nanubod ang luha ni Reming nga nagtutok sa hulagway sa Inahan sa Kanunay’ng Panabang. Niining iya karong pangaliyupo, wala’y laing naumol sa iyang hunahuna; pakilooy nga hatagan unta siya og lain nga kapaninguhaan sa ilang inadlaw nga panginahanglan. Sa iyang edad nga saysenta singko wala nay modawat nga kompaniya.

Ang kalisud sa panginabuhi nga iyang nahiaguman; nakapa-hinumdom sa iyang kahamugaway dihang nagtrabaho pa siya sa Saudi Arabia. Pagkamabalhinon sa panahon. Kaniadto siya maoy pamaskohan. Karon wala siya’y kapangayuan. Butang nga wala niya kapangandami.

Human sa pangamuyo, migula si Reming sa Redemptorist Church nga huyhoy ang abaga.

Sa dihang molabang na unta siya, may mikablit sa iyang kilid nga nangumusta: “Kumusta ka Ming? Unsay imong gipanginabuhian karon?”

“Uy Art, ikaw diay! Nangahente lang ko sa PhilamLife. Wala may lain nga kapaingnan. Ikaw kumusta man sab? Hain na man ka karon?” tubag-pangutana ni Reming ngadto ni Art nga iyang labaw sa dihang nag-uban pa sila sa Atlas Mining, Lutopan.

“Pagsira sa Atlas Mining nangita ko og trabaho sa Manila. Gisuwerte ko kay may gitukod nga kompaniya sa nikel sa Rio Tuba, Palawan.  Vice President-Environment/External Affairs ako karon sa kompaniya nga akong gitrabahoan. Nangita ko karon og inhenyero nga may katakus, kasinatian, ug kahanas modumala og planta sa elektrisidad” tug-an ni Art.

“Di ba PEE (Professional Electrical Engineer) man ka? Gisigihan ba nimo og pa-renew ang imong lisensya? Aduna ka bay selyo sa PEE?” sunod-sunod nga pangutana ni Art.

Human matubag ni Reming ang tanan nga mga pangutana, mitanyag si Art kaniya: “Ugma sa alas onse sa buntag adto ta mag-abot sa Starbuck Coffee sa Ayala aron pirmahan ang kontrata nga ikaw maoy Resident PEE Consultant sa kompaniya.”

Mora’g galutaw ang tiil ni Reming nga mibalik pagluhod atubangan sa Inahan sa Kanunay’ng Panabang nga nagkanayon: “Salamat Mama Mary, pinaagi ni Art; gihatagan mo ako og kinanindotan nga pinaskohan sa akong kinabuhi. Merry Christmas.” (Kataposan)