Isla Paraiso

Gula 29

Giablihan ni sister Veronica ang ref. Gikawhat niya kadtong pitser nga puno sa bugnaw nga tubig. Dayon gisunod niya pagkawhat ang baso nga nahimutang sa banggera dili layo sa nahimutangan sa ref. Nag-ipis siya’g tubig ngadto sa baso. Gihurot niya’g inom ang tubig. Nabatyagan niya ang diyotay’ng kahilwas sa iyang kahiladman nga nasubhan sa kabugnaw sa tubig.

Human ikauli ni sister Veronica ang pitser ngadto sa sulod sa ref, mibalik siya ngadto sa iyang lawak. Midiretso siya paghigda human katak-opi ang pultahan. Buot na siyang makatulog sanglit lawom na ang kagabhion.

Giliminan pag-ayo ni sister Veronica ang tibuok niyang lawas sa habol nga may pagkabagaon. Gipiyong niya ang iyang mga mata taliwala sa kangitngit kay gusto na siyang makatulog. Apan nakit-an na hinuon niya sa sangi sa iyang handurawan ang bayhon ni Rey Corpuz. Nagkatawa kini nga nagsud-ong kaniya.

Mikalit pagbangon si sister Veronica. Naghangos siya nga milingkod sa ngilit sa iyang kama taliwala sa kangitngit. Daw sa nakakita siya’g makalilisang nga talan-awon sa usa ka damgo bisan og nagmata siya. Ingon sa usa ka multo ang bayhon ni Rey nga iyang nakita taliwala sa kangitngit.

Nakapanglingo si sister Veronica ug dayon mibuhi og halawom nga panghupaw. Wala tuyoa nga nakumot niya ang iyang agtang. Iyang natugkad nga lahi ang situwasyon sa pagpangulitawo ni Rey kaniya kaniadto ug karon. -- Sumpayan pa