Mananaygon

Gitutokan sa ubang kustomer ang duha ka mananaygon nga giabi-abi pag-ayo ni Robert didto sa fast food store.

“Unsay gusto ninyo nga kan-on?” gipangutana ni Robert ang tiguwang ug ang babaye nga iyang kuyog. “Ikaw la’y mag-igo sir uy, gamaya lang kay basin daku ka na og mabayran,” sa tiguwang pa.

Human makahatag sa iyang order nga pagkaon, mibalik si Robert sa lamesa nga nahimutangan sa tiguwang ug sa iyang apo. Nagpaila si Robert kanila ingon man ang tiguwang nagpaila ‘sab.

“Ako si Felomina sir, unya kining akong apo si Marilyn,” matud sa tiguwang nga mitutok kang Robert. Gitagsa-tagsa paglamano ni Robert ang tiguwang apan dugay niya nga gibuhian ang kamot sa apo niini nga si Marilyn.

“Ayaw kauwaw nako Lyn ha?” matud ni Robert dungan sa pagbuhi og tam-is kaayo nga pahiyom. Gisaysay ni Felomina nga mata’g Pasko gayud nga manaygon siya sa dakbayan sa Sugbo kay wala g’yud sila kapaninguhaan sa ilang dapit sa Barili.

Nasayran ni Robert nga 19-anyos na si Marilyn apan igo ra nakatapos sa high school kay wala nay ikagasto si Felomina pagpatungha niini sa kolehiyo. Anaa diay kini magpuyo si Marilyn ipon sa iyang Lola kay patay na ang iyang amahan ug inahan.

Gisaysay ni Felomina nga sa ilang pagpanaygon dinhi sa dakbayan sa Sugbo molimpyo gayud sila og mga P3,000 nga madala nila pagpauli sa Barili. “Wala ka ba’y plano nga manarbaho dinhi sa siyudad Lyn?” gipangutana ni Robert si Marilyn.

Ang apohan maoy misagbat  ug mitubag kang Robert. “Gusto unta bitaw na si Marilyn nga manarbaho sir apan mahadlok kay basin og maka-agawon og maldito nga binuangan ra unya siya.”

Nakasabot si Robert mao nga igo lang siya nga miyango-yango samtang gitutokan niya si Marilyn. “Kun gusto ka Lyn, adto lang kamo si Lola nimo sa balay. Ayaw na lang kamo panaygon ug ako na’y mohatag kaninyo sa inyong kitaon sa pagpanaygon kun mopauli na kamo sa Barili.”

Giingnan ni Robert si Felomina nga nagkinahanglan lang siya og makaatiman sa iyang balay ug manglaba sa iyang sinena. Bugtong anak si Robert ug patay na usab ang iyang amahan ug inahan mao nga siya ang manunod sa ilang katigayonan.

“Sa akong giingon kaninyo nga dili kamo mauwaw kanako kay buotan ko nga pagkatawo,” dugang pasabot ni Robert. Tuod, nakombinsir ni Robert ang apohan ug apo nga adto na lang moestar sa iyang balay atul sa Pasko ngadto na sa Bag-ong Tuig. Gi-serve na ang giorder nga pagkaon ni Robert. “Sigi mangaon na ta Lola, Lyn,” ni Robert pa. -- Sumpayan