Awit ug gugma

Gula 2

Milampus gayud si Edgar kay dihang gitug-anan niya si Althea kabahin sa gitipigan niya’ng pagbati wala magduha-duha ang singer sa pagdawat sa iyang gugma. Sa makausa pa nahatagan pagbalik og kadasig si Edgar.

Anam-anam nga nahanaw ang kasubo ni Edgar tungod sa pagkahanaw kaniya ni Nelia. Wala maglisud si Edgar sa pag-angkon ni Althea tungod kay moinum og makahubog ang singer ug misugot kini nga mouban kang Edgar sa mabugnaw’ng lawak.

Dili tuyoon ni Edgar nga mobati siya og kaselos ngadto ni Althea panahon nga makita niya ang singer nga makigsuod sa mga kauban niini sa combo. Kini maoy sagad nila nga awayan kay dili makapugong si Althea nga makigsuod sa iyang mga kauban.

Usa ka higayon, human sa ilang pagparayganay ni Althea sulod sa motel, nagkalalis sila si Edgar dihang gipahinumdoman pagbalik sa ulitawo ang singer nga dili siya gusto nga magpahikap-hikap kini sa ubang lalaki nga sagad niya makita.

Walay maayo nga relasyon sila nga nanggawas sa motel. Nag-iyahay lang sila’g pauli kay misirit man si Nelia pagsakay’g taksi ug gibiyaan ra si Edgar. Misantup sa huna-huna ni Edgar nga putlon na ang ilang relasyon ni Althea.

Gilingaw ni Edgar ang iyang kaugalingon sa pagsuroy sa downtown area. Misulod siya sa mga department stores ug nagkalingaw pagtan-aw sa mga gi-display nga mga baligya bisan og wala siya’y tinguha nga mopalit. Miduol siya sa gi-display nga mga T-shirts. “Pagpili lang sir kay kuhaan tika sa imong size kun makapili ka na,” matud sa mapahiyumong salesgirl nga miabi-abi ni Edgar. Gikalingawan ni Edgar og pakigsulti ang salesgirl.

Nalooy si Edgar pagkasayud nga gamay ra diay kaayo’g sweldo ang mga tindera sa maong department store ug nagsalig ra kini sa ihatag kanila nga incentive kun makabaligya sila’g dakung kantidad.

“Ang imong gidawat nga sweldo dinhi miss dili katumbas sa imong kaanyag,” giboladahan ni Edgar ang tindera. Hinoon wala maglimod si Edgar kay tinuod man ‘sab nga may hitsura nga ikapasigarbo ang maong salesgirl.

Nakahukom si Edgar nga mopalit na lang og T-shirt ug karsones-maong para mahalinan si Maridel, ang salesgirl.

Milabay ang mga adlaw, usa ka buntag nga nagmaneho si Edgar sa iyang kotse, nasigpatan niya si Maridel nga naglakaw duol sa Cebu City Medical Center. Gihunongan ni Edgar ang dalaga.

“Remember? Ako kadtong mipalit nimo’g T-shirt ug karsones?” giingnan ni Edgar ang salesgirl nga si Maridel ug gisinyasan nga pasakyon. “Dali ihatud tika sa imong trabahoan Del.”

Misamot kalooy si Edgar dihang nasayud nga si Maridel mag-antus lang paglakaw paingon ug pauli sa iyang trabahoan aron makadaginot sa gamay ra niya nga sweldo. - Sumpayan